ՀՀ ԱԳ նախարար Էդվարդ Նալբանդյանը հույս է հայտնել, որ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը թույլ կտա մի փոքր էլ մերձեցնել կողմերի դիրքորոշումները:
Հայաստանի և Ադրբեջանի նախագահների հանդիպումը տեղի կունենա հուլիսի 18-ին Մոսկվայում՝ միջազգային ոչ պաշտոնական միջոցառման՝ «ՌԴ նախագահի մրցանակի ձիարշավի» ընթացքում։
«Նախագահները կշարունակեն խաղաղ գործընթացի քննարկումը: Դուք գիտեք, որ սա արդեն վեցերորդ հանդիպումն է: Այս հանդիպումներն անհրաժեշտ է ընկալել որպես գործընթաց: Իհարկե, յուրաքանչյուր հանդիպում տալիս է թեև փոքր, սակայն արդյունք, ինչն իր հերթին հնարավորություն է տալիս կազմակերպել նոր հանդիպումներ», - հինգշաբթի Ստեփանակերտում ԼՂՀ նախագահ Բակո Սահակյանի հետ հանդիպումից հետո լրագրողներին հայտարարել է Նալբանդյանը:
Ինչպես հաղորդում է «Նովոստի-Արմենիա» գործակալության թղթակիցը Ղարաբաղի մայրաքաղաքից, ՀՀ ԱԳ նախարարը Ստեփակարտ կատարած իր այցը բացատրել է ԼՂՀ ղեկավարության հետ կարծիքների փոխանակման անհրաժեշտությամբ, ինչը նրա խոսքերով՝ բազմիցս արվել է ղարաբաղյան հակամարտության կարգավորմանն ուղղված հանդիպումների նախօրեին և դրանցից հետո:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
