ՀՀ Սահմանադրական դատարանի նոր անդամը երդվել է երկրի խորհրդարանում

ՀՀ Սահմանադրական դատարանի նորանշանակ անդամ Մանուկ Թոփուզյանը ուրբաթ երդվել է ՀՀ ԱԺ արտահերթ նիստի ընթացքում, հաղորդում է «Նովոստի-Արմենիա» գործակալության թղթակիցը:

Ստանձնելով ՀՀ Սահմանադրական դատարանի անդամի պաշտոնը՝ Թոփուզյանը երդվել է ապահովել Սահմանադրության գերակայությունը, լինել անկողմնակալ և հավատարիմ Սահմանադրությանն ու Սահմանադրական դատարանի անդամի կոչմանը:

ՀՀ նախագահ Սերժ Սարգսյանը չորեքշաբթի հրամանագիր է ստորագրել Մանուկ Թոփուզյանին ՀՀ նախագահի խորհրդականի պաշտոնից ազատելու մասին, մեկ այլ հրամանագրով Թոփուզյանը նշանակվել է ՀՀ Սահմանադրական դատարանի անդամ:

Մանուկ Թոփուզյանը ծնվել է 1949 թ.-ի մարտի 5-ին, Երևանում: 1973թ.ին  գերազանցության դիպլոմով ավարտել է ԵՊՀ-ի իրավաբանական ֆակուլտետը: 1977-1987թթ. Երևանի «Նաիրիտ» գիտաարտադրական միավորումում աշխատել է ավագ իրավախորհրդատու, 1987-1991թթ.՝ ՀՀ պետական արբիտրաժում, որպես պետական արբիտր, կոլեգիայի անդամ:

1991թ. նոյեմբերի 1-ից մինչև 2000թ. եղել է ՀՀ կառավարության իրավաբանական վարչության պետ, ՀՀ արդարադատության նախարարի տեղակալ: 2000թ. նոյեմբերի 6-ին նշանակվել է ՀՀ կառավարության աշխատակազմի ղեկավար-նախարար: Միաժամանակ հանդիսացել է ՀՀ պետական կառավարման համակարգի բարեփոխումների հանձնաժողովի նախագահ:

2008թ. ապրիլի 21-ին նշանակվել է ՀՀ նախագահի խորհրդական:

Թոփուզյանը պարգևատրվել է ՀՀ «Մխիթար Գոշ», ՀՀ ՊՆ «Գարեգին Նժդեհ»,ՀՀ Ոստիկանության «Արամ Մանուկյան» մեդալներով, ՀՀ վարչապետի հուշամեդալով, Ֆ. Նանսենի ոսկյա մեդալով: Հրետանու պահեստազորի սպա է: Ամուսնացած է, ունի 2 զավակ, 2 թոռ:-0-