Հունաստանի ԱԳ նախարար Դորա Բակոյանիսը հեռանկարային է համարել հայ-հունական հարաբերությունները:
«Մեր երկկողմ հարաբերություններն ուղղակի հիանալի են»: Մենք զարգացնում ենք մեր ժողովուրդների միջև երկար ժամանակ գոյություն ունեցող բարեկամական հարաբերությունները», - ասաց Բակոյանիսն ուրբաթ Երևանում տեղի ունեցած մամուլի ասուլիսի ժամանակ:
Հունաստանի ԱԳ նախարար, ԵԱՀԿ գործող նախագահ Դորա Բակոյանիսն ՀՀ ԱԳ նախարար Էդվարդ Նալբանդյանի հրավերով հուլիսի 2-3-ն աշխատանքային այցով գտնվում է Հայաստանում:
«Ես ուրախ եմ լինել Հայաստանում, որտեղ յուրաքանչյուր հույն իրեն զգում է ինչպես իր տանը: Մեր ժողովուրդների միջև գոյություն ունեն պատմական ընդհանրություններ և երկարատև բարեկամական կապեր, որոնք երկկողմ միջպետական հարաբերությունների խթանիչներն են», - կարծում է Բակոյանիսը:
Հայաստանի և Հունաստանի միջև արտաքին առևտրաշրջանառությունը 2009թ.-ի հունվար-մայիս ամիսներին ավելացել է 6,8 տոկոսով և կազմել 9,6 մլն դոլար: ՀՀ ազգային վիճակագրական ծառայության տվյալների համաձայն՝ Հայաստանից Հունաստան իրականացվող արտահանման ծավալը կազմել է 74 հազար դոլար (Հայաստանից իրականացված ողջ արտահանման 0,03 տոկոսը)՝նշված ժամանակահատվածում կրճատվելով 41,9 տոկոսով՝ 2008թ.-ի հունվար-մայիս ամիսների ցուցանիշների համեմատ:
Հայաստան ներկրված հունական արտադրության ապրանքների ծավալը հաշվետու ժամանակաշրջանում կազմել է 9,5 մլն դոլար՝ ավելանալով 7,5 տոկոսով: Միաժամանակ Հունաստանի տարածքից իրականացվող ներկրման ծավալը ընդհանուր առմամբ կազմել է 8,9 մլն դոլար (37,2 տոկոսի անկում) կամ ներկրման ընդհանուր ծավալի 0,8 տոկոսը:-0-
