Հայաստանի հարցը չի քննարկվի ԵԽԽՎ աշնանային նստաշրջանում, ասաց ԵԽԽՎ հայկական պատվիրակության ղեկավար, Հայաստանի Ազգային ժողովի պետաիրավական հարցերի մշտական հանձնաժողովի նախագահ Դավիթ Հարությունյանը։
«Ես կարծում եմ, որ մեր հարցը չի քննարկվի, եթե երկրում անկանխատեսելի իրադարձություններ տեղի չունենան»,- երեքշաբթի հայտնեց նա լրագրողներին։
Այս կապակցությամբ Հարությունյանը նշեց, որ անկանխատեսելի իրադարձություններ կարող են տեղի ունենալ ցանկացած երկրում։
«Օրինակ, Ռուսաստանի և Վրաստանի հարցը նախատեսված չի եղել, սակայն անկանխատեսելի դեպքեր տեղի ունեցան, և այդ հարցը դարձավ քննարկման առարկա, իսկ Իրանում տեղի ունեցած վերջին դեպքերը ստիպեցին ԵԽԽՎ-ին անհապաղ քննարկումներ կազմակերպել, թեպետ Իրանը ԵԽ անդամ չէ»,- ասաց նա։
Խոսելով համազեկուցողների՝ Հայաստան հնարավոր այցի մասին, հայկական պատվիրակության ղեկավարն ասաց, որ իրենք են ծրագրում իրենց այցերն ինչպես իշխանություններից, այնպես էլ ընդդիմությունից ստացվող տեղեկատվության հիման վրա։
Հունիսի 24-ին Ստրասբուրգում ԵԽԽՎ ամառային նստաշրջանում քննարկվում էր, թե ինչպես է Հայաստանը իրականացնում Վեհաժողովի կողմից ավելի վաղ ընդունված բանաձևեր կատարման գործընթացը։ ԵԽԽՎ նիստում Հայաստանի մասով ընդունվեց նոր՝ №1677 բանաձևը, որի համաձայն երկիրը կշարունակի մնալ մոնիտորինգի ներքո։ -0-
