Հայաստանի և Ադրբեջանի միջև երկխոսության հաստատման հնարավորությունը ուրբաթ Երևանում քննարկում են «Երկխոսության հնարավորությունները. ինչպես արձագանքել ատելության դրսևորումներին» ֆորումի մասնակիցները։ Ֆորումը կազմակերպել է Խաղաղապահության և հակամարտության հաղթահարման ռեսուրս-կենտրոնը՝ Internatiоnal Alert բրիտանական կազմակերպության աջակցությամբ։
Ինչպես հայտարարեց կազմակերպիչներից մեկը՝ Ռեսուրս-կենտրոնում Քաղաքացիական հասարակության ինստիտուտի ներկայացուցիչ Արտակ Կիրակոսյանը, Հայաստանի և Ադրբեջանի միջև գոյություն ունեցող կոնֆլիկտային իրավիճակն իր մեջ շատ վտանգներ է պարունակում, ինչի վկայությունն է, նրա խոսքերով, Ադրբեջանի նախագահ Իլհամ Ալիևի վերջերս արած հայտարարությունն այն մասին, որ Հայաստանի հետ պատերազմը դեռևս ավարտված չէ։
«Ամենագլխավոր վտանգը երկու ժողովուրդների միջև խորացող ատելությունն է, որը հանգեցնում է նրան, որ մարդիկ չեն հավատում, որ կարող է հակամարտության լուծում գտնվել», - հայտարարել է Կիրակոսյանը «Նովոստի-Արմենիա» գործակալությանը։
Նրա խոսքերով՝ հետևաբար հասարակությունը պետք է առավել նախաձեռնող լինի, քայլեր ձեռնարկի, որոնք կծառայեն երկու ժողովուրդների միջև թշնամանքի մթնոլորտի թուլացմանը։ «Մեր ֆորումը նվիրված է նրան, թե ինչպիսին պետք է լինեն այդ քայլերը, և դրանք հնարավո՞ր են, արդյոք, ընդհանրապես», - ավելացրեց Կիրակոսյանը։
Նրա կարծիքով՝ թշնամանքի հիմքում ընկած է վախը, որն առկա է և հայկական, և ադրբեջանական հասարակություններում։ Միաժամանակ նա նշեց, որ Հայաստանում հասարակությունը պակաս ագրեսիվ է տրամադրված, քան Ադրբեջանում, «սակայն, այնուամենայնիվ, վտանգավոր միտումներ կան»։
Կիրակոսյանը կարծում է, որ անհրաժեշտ է խուսափել երկու ծայրահեղություններից՝ կամ չափազանց ագրեսիվ պատասխանել թշնամական դրսևորումներին, կամ փորձել խուսափել հակամարտություններից։
Այսօր ավարտվող ֆորումի ձևաչափը նախատեսում է տարբեր հարցերի աշխատանքային խմբերի ստեղծում, որոնք ավելի ուշ բաց քննարկման կներկայացնեն իրեն եզրահանգումները։-0-
