Հայ միգրանտները չեն շտապում Ռուսաստանից Հայաստան վերադառնալ. Միգրացիայի վարչություն

Հայ միգրանտները չեն շտապում Ռուսաստանից Հայաստան վերադառնալ, ասաց ՀՀ տարածքային կառավարման նախարարության Միգրացիայի գործակալության պետ Գագիկ Եգանյանը հինգշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ:

«Ռուսաստանից Հայաստան վերադարձող միգրանտների զանգվածային հոսք դեռ չի գրանցվել, ինչպես նախորդ տարիներին, կան առանձին դեպքեր, որոնք էական բնույթ չեն կրում»,- ասաց Եգանյանը:

Նա նշեց, որ համաշխարհային ճգնաժամի ու Ռուսաստանի վրա դրա ազդեցության պատճառով Հայաստանն ավելի շատ միգրանտների վերադարձ էր ակնկալում, ովքեր արդեն երկար տարիներ ապրում և աշխատում են ՌԴ տարածքում, սակայն սեփական տուն չունեն:

«Ճգնաժամի արդյունքում առաջացած գործազրկությունը հաշվի առնելով՝ մենք դեպի Հայաստան եկող նման մարդկանց հոսք էինք սպասում, անգամ Ռուսաստանի համապատասխան միգրացիոն ծառայությունների հետ պայմանագիր էինք կնքել նրանց վերադարձի գործընթացը հեշտացնելու համար, սակայն հայրենիք վերադարձողների թիվը դեռ առանձնապես մեծ չէ»,- ասաց Եգանյանը:

Նա նշեց, որ թեպետ հայ միգրանտներից շատերը ճգնաժամի պատճառով Ռուսաստանում կորցրել են աշխատանքը, նրանք, միևնույն է, չեն շտապում հայրենիք վերադառնալ և փող վաստակելու նոր ուղիներ են փնտրում:

Անկախ փորձագետների գնահատականով, Ռուսաստանում միայն Հայաստանից եկած աշխատանքային միգրանտների թիվն ավելի քան 1 միլիոն աշխատանքային տեղ է կազմում: 

Միգրացիան Հայաստանում սկսվել է 1992թ.-ից, սակայն 2003թ.-ից մինչ օրս միգրացիոն հոսքերի ծավալները զգալիորեն նվազել են: Բացի այդ, 2004թ.-ից հետո նկատվել է նաև վերադարձողների թվի աճ:

Տարբեր գնահատականներով, վերջին 15 տարվա ընթացքում Հայաստանից հեռացել է 800 հազարից 1,5 միլիոն հոգի:-0-