ԵԱՀԿ Մինսկի խմբի նախկին համանախագահ (Ռուսաստան), Ռուս դիվանագետների ասոցիացիայի փոխնախագահ Վլադիմիր Կազիմիրովի «Խաղաղություն Ղարաբաղին» գրքի շնորհանդեսը տեղի կունենա Երևանում հունիսի 26-ին, Մոսկվայի տան Մշակութային-գործարար կենտրոնի ցուցահանդեսների սրահում:
«Խաղաղություն Ղարաբաղին» գրքում Կազիմիրովը պատմում է ղարաբաղյան հակամարտության կարգավորման գործում Ռուսաստանի միջնորդական գործունեության մասին, ներկայացնում է ԵԱՀԿ Մինսկի խմբի գործունեության շրջանակներում անցկացված բանակցությունների ժամանակագրությունը, ինչպես նաև բանակցությունների ընթացքում ստորագրված հիմնական միջազգային փաստաթղթերը:
Գրքում ներկայացված են ղարաբաղյան հակամարտության կարգավորման գործընթացի մասին հեղինակի հիշողությունները, հիմնականում՝ այն շրջանի վերաբերյալ, երբ նա գլխավորում էր Ռուսաստանի միջնորդական առաքելությունը, ՌԴ նախագահի՝ Լեռնային Ղարաբաղի հարցերով ներկայացուցիչն էր, ինչպես նաև Ռուսաստանից ԵԱՀԿ Մինսկի մասնակիցն ու համանախագահը (1992-96):
«Կազիմիրովի գիրքը հայրենական գրականության մեջ լայնամասշտաբ պատերազմի վերածված հակամարտության պատմության, ինչպես նաև Ռուսաստանի միջնորդական գործունեության մանրամասն և փաստագրված լուսաբանումն է, որը 1994թ.-ի մայիսի 12-ին հանգեցրեց հրադադարի մասին համաձայնագրի ձեռքբերմանը», - ասվում է հրատարակության ծանոթագրության մեջ:
Գիրքը բաղկացած է երկու հիմնական բաժնից, որտեղ Կազիմիրովը ներկայացնում է ղարաբաղյան հակամարտության կարգավորման գործընթացի վերաբերյալ իր հիշողություններն ու հիմնական փաստարկները:
Ղարաբաղյան հակամարտության կարգավորման գործընթացի վերաբերյալ գիրք գրելու հիմնական պատճառների թվում Կազիմիրովն իր կայքում նշում է «ղարաբաղյան հակամարտության կարգավորման գործընթացի և հատկապես գործընթացում Ռուսաստանի դերի մասին բազմաթիվ անճշտությունները, կուտակումները, խառնաշփոթությունները, կեղծ տարբերակները, պահանջատիրական պնդումները»:
«Քչերին է բախտ վիճակվել այդ ժամանակ իմանալ գործընթացի մասին ավելի շատ, քան ինձ: Անհրաժեշտ է վերջ դնել Ղարաբաղի հակամարտության կարգավորման գործընթացում Ռուսաստանի դերի շուրջ առաջացած ստին և անհիմն մեղադրանքներին...», - նշում է գրքի հեղինակը:
Վլադիմիր Կազիմիրովը ռուսական միջնորդական առաքելության նախկին ղեկավարն (1992-1996 гг.) ու ՌԴ նախագահի՝ Լեռնային Ղարաբաղի հակամարտության քաղաքական կարգավորման հարցերով լիազոր ներակացուցիչն է եղել: Այժմ նա զբաղեցնում է Ռուս դիվանագետների ասոցիացիայի փոխնախագահի պաշտոնը: Բազմաթիվ գիտական հոդվածների և գրքերի հեղինակ է:-0-
