ԾԱՂԿԱՁՈՐ, 22 հունիսի. /Նովոստի-Արմենիա/. ԱՄՆ-ն չի պատրաստվում հրաժարվել Հայաստանի վրա հակառուսական ազդեցություն գործելուց, կարծում է ՌԴ ԱԳՆ ՄՀՄՊԻ Կովկասյան հետազոտությունների կենտրոնի փոխտնօրեն Վլադիմիր Զախարովը:
«Տիկին Մարի Յովանովիչի նշանակումը Հայաստանում դեսպանի պաշտոնում բավականին հատկանշական է: Կասկած չկա, որ նրա գործն ուղղված է լինելու հերթական ծաղկային հեղափոխության սցենարի մշակմանը, հիմա արդեն՝ Հայաստանում»,- երկուշաբթի Ծաղկաձորում ասաց նա «Տարածաշրջանը երեք ծովերի (Միջերկրական, Սև և Կասպից) համակարգում: Հայաստանի դերը Կովկասում» կլոր սեղանի ժամանակ «Հայաստանը հեռահաղորդակցությունների խաչմերուկում» թեմայով միջազգային կոնֆերանսի շրջանակներում:
Այկս առնչությամբ Զախարովը մեջբերեց Իզմիրի տնտեսական համալսարանի միջազգային հարաբերությունների բաժնի աշխատակից դոկտոր Նեժատ Տարակչիի խոսքերն այն մասին, որ «Հայաստանը ամենահեշտը կարող է ինտեգրվել արևմտյան բլոկին՝ հայկական աշխարհասփյուռ ազդեցիկ սփյուռքի, ինչպես նաև արևմտյանին նման կրոնական ու մշակութային արժեքների շնորհիվ: Ռուսաստանից Հայաստանի կախվածության նվազեցման ծրագրերը թեև դանդաղ, բայց իրականացվում են»:
Ռուս քաղաքագետը կարծում է, որ ներկայումս նոր համաշխարհային նախագծի մի մասը Սևծովյան-Կասպիական տարածաշրջանի լիակատար վերակազմավորումն է՝ Ռուսաստանից Վրաստանի ու Ադրբեջանի անջատումով, ինչպես նաև Ռուսաստանից Հայաստանի մեկուսացմամբ:
«Գաղտնիք չէ նաև այն փաստը, որ ԱՄՆ հիմնական նպատակը Կովկասի տարածաշրջանում մշտական հիմունքներով իր զինված ուժերը տեղակայելն է, որոնք կազդեին տեղական քաղաքական որոշումների վրա ու վերահսկողություն կապահովեին»,- ասաց նա:
Զախարովը պնդում է, որ Վրաստանն ու Ադրբեջանը Ռուսաստանի հարավը ապակայունացնելու գլխավոր հարթակն են, առաջին հերթին՝ Հյուսիսային Կովկասի հանրապետությունները, բայց Հայաստանը ևս ԱՄՆ շահերի առաջին գծում է:
«Այստեղ արդեն ռուս-հայկական ռազմավարական գործընկերության քայքայման քաղաքականություն է տարվում և հետևողական կերպով Երևանի փոխադրում դեպի ամերիկյան շահերի ուղի»,- նշեց քաղաքագետը: -0-
