ԵՐԵՎԱՆ, 19 հունիսի. /Նովոստի-Արմենիա/. Ուրբաթ երևանյան միջազգային «Ոսկե ծիրան» կինոփառատոնի կազմն է հրապարակվել փառատոնի ծրագրային տնօրեն Միքայել Ստամբոլցյանի կողմից։
«Ոսկե ծիրան» միջազգային վեցերորդ կինոփառատոնը կանցկացվի Երևանում հուլիսի 12-ից 19-ը։
«Յուրաքանչյուր փառատոնի հեղինակության մակարդակը կախված է ժյուրիի որակյալ կազմից»,- տեղեկացրեց Ստամբոլցյանը մամուլի ասուլիսի ժամանակ։
Նրա խոսքերով, փառատոնի կազմակերպիչներն այս սկզբունքով են առաջնորդվել ժյուրիի հինգ իրավասու կազմերի ընտրության ժամանակ։
Երեք կազմ կգնահատի մրցութային ֆիլմերը ներկայացված երեք անվանակարգում, ինչպես նաև «ՖԻՊՐԵՍՍԻ» (Կինոլրագրողների միջազգային ֆեդերացիա) անկախ ժյուրին և Էկումենիկ կամ եկեղեցական ժյուրին, որը գործում է գործնականորեն բոլոր միջազգային փառատոներում։ Այսպիսով, միջազգային-խաղային անվանակարգում ներկայացված մրցութային ֆիլմերը կդատի ներկայացուցչական բազմազգ ժյուրին, որի կազմում են Ալբերտ Վիդերշպիլը /Գերմանիա/, որը «20-րդ դար Ֆոքս» կինոընկերության գերմանական մասնաճյուղի նախկին ղեկավարն է, Պակո Պոշը /Իսպանիա/, որը հանրահայտ Պեդրո Ալմոդովարի առաջին ֆիլմի պրոդյուսերն է, Էրիկ Պողոսյանը /ԱՄՆ, Բեռլինի կինոփառատոնի մրցանակակիր, Նանա Ջորջաձե /Վրաստան/, ում «Սիրո ուսուցիչ» ֆիլմը Օսկարի է հավակնել լավագույն արտասահմանյան ֆիլմ անվանակարգում, Արսինե Խանջյանը /Կանադա/՝ դերասանուհի, հայտնի ռեժիսոր Ատոմ Էգոյանի կինը:
Ժյուրիի նախագահը կլինի ճապոնացի ճանաչված կինոռեժիսոր, 1990թ.-ի Կաննի կինոփառատոնի դափնեկիր Կոհեյ Օգուրին:
Միջազգային վավերագրական կինո անվանակարգում ներկայացված ֆիլմերի ժյուրիի նախագահը Ալեքսանդր Ռոդնյանսկին է, ով ռուսական «Կինոտավր» կինոփառատոնի ղեկավարն է: Ժյուրիի կազմում են նաև Մայքլ Վիդեմանը /Գերմանիա, Յան-Հայդն Սմիթը /Մեծ Բրիտանիա/, Էնիս Ռիզան /Թուրքիա/, Արտյոմ Մելքումյանը /Հայաստան/:
«Հայկական համայնապատկեր» անվանակարգի հաղթողին կորոշի արևմտյան ու եվրոպական կինոյի հայազգի ներկայացուցիչներից կազմված ժյուրին:
Ժյուրիի նախագահն է Հայկ Բալայանը /Նիդեռլանդներ/, ով Հոլանդիայի և Բելգիայի կինոարդյունաբերության զարգացման գործում մեծ ներդրում ունեցած «PolyGram Filmed Entertainment»-ի տնօրենն է:
«Ժյուրիի անդամներից շատերը առաջին անգամ կայցելեն Հայաստան փառատոնի շրջանակներում»,- նշեց Ստամբոլցյանը:
«ՖԻՊՐԵՍՍԻ» ժյուրիի կազմում ընդգրկված են Ժան-Մաքս Մեժանը /Ֆրանսիա/, Ջովաննի Օտտոնեն /Իտալիա/, Արծվի Բախչինյանը /Հայաստան/:
Անկախ եկեղեցական էկումենիկ ժյուրիի դատին, որի կազմում են Գվիդո Կոնվենտսը /Բելգիա/, Դենիս Մյուլերը /Ֆրանսիա/ և Հայ Առաքելական եկեղեցու ներկայացուցիչը, կհանձնվեն ոչ միայն կրոնական, այլև հոգևոր բովանդակությամբ ֆիլմեր:
Ստամբուլցյանը նշեց նաև, որ «Ոսկե ծիրան» փառատոնին «ՖԻՊՐԵՍՍԻ» ժյուրին ու էկումենիկ ժյուրին գործում են արդեն 3 տարի:
«Ոսկե ծիրան» կինոփառատոնն այս տարի անցկացվում է 6-րդ անգամ` հուլիսի 12-19-ը, ՀՀ մշակույթի նախարարության աջակցությամբ: Կինոփառատոնը, ըստ ավանդույթի, կունենա երեք հիմնական ծրագիր՝ խաղարկային և վավերագրական ֆիլմի միջազգային մրցույթ, ինչպես նաև «Հայկական համայնապատկեր» մրցույթ։
Փառատոնին մասնակցելու է շուրջ 300 ֆիլմ՝ 60 երկրից։ Փառատոնի գլխավոր հովանավորն է ՎիվաՍել-ՄՏՍ ընկերությունը:-0-
