Երկրաշարժի կրկնություն Հայաստանում չի սպասվում. Սեյսմիկ ծառայության պետի տեղակալ

ԵՐԵՎԱՆ, 19 հունիսի. /Նովոստի-Արմենիա/. Երկրաշարժի կրկնություն Հայաստանում չի սպասվում, ուրբաթ լրագրողներին հայտնեց Հայաստանի սեյսմիկ պաշտպանության ազգային ծառայության պետի տեղակալ Հրաչյա Պետրոսյանը:

Հինգշաբթի տեղական ժամանակով 12:34-ին Հայաստանում տեղի է ունեցել 3,6 մագնիտուդով և 5 բալ ուժգնությամբ երկրաշարժ, էպիկենտրոնը եղել է Գառնի քաղաքից 10 կմ դեպի հյուսիս: 3-4 բալանոց ցնցումներ են գրանցվել նաև Երևանում և մերձակա բնակավայրերում:

«Գառնիում երեկվա երկրշարժից հետո, սեյսմակայանները գրացնել են 11 հետցնցում նույն շրջանում, դրանք շատ թույլ են եղել, վերջին հետցնցումը տեղի է ունեցել տեղական ժամանակով 8.44-ին»,- ասաց Պետրոսյանը:  

Նրա խոսքերով, այդ հետցնցումները սովորական երևույթ են երկրաշարժից հետո, որոնք ցույց են տալիս, որ սեյսմիկ էներգիայի մարում է տեղի ունենում:

Այս առնչությամբ Պետրոսյանը նշեց, որ տվյալ պահին բնակչությունը երկրաշարժի կրկնման առչությամբ անհանգստության ու խուճապի պատճառ չունի:

ՀՀ ԱԻՆ առընթեր Փրկարար ծառայության պետի խորհրդական, գնդապետ Նիկոլայ Գրիգորյանն իր հերթին ասաց, որ երկրաշարժը կանխագուշակելը շատ բարդ է, և ողջ աշխարհի գիտնականներն աշխատում են այս ուղղությամբ:

Երկրաշարժի կապակցությամբ ամբողջ երկրում լուրեր տարածվեցին հնարավոր կրկնվող ցնցումների մասին: Որոշ հաստատություններում և ուսումնական հաստատություններում աշխատակիցների տարերային տարհանում սկսվեց:

«Երկարաժամկետ առումով մենք գիտենք, որ ապրում ենք սեյսմավտանգ գոտում, բայց երկրաշարժը կանխագուշակել այսօր ոչ ոք չի կարող»,- ասաց Գրիգորյանը:

Նրա խոսքերով, Հայաստանը բազում ցնցումներ է տեսել և սրանից օգտվելով որոշ մարդիկ հատուկ վախի մթնոլորտ են ստեղծում: -0-