Ազգերի ինքնորոշման իրավունքը հարգելը բավարար հիմք է աշխարհի բոլոր ճգնաժամերի ու հակամարտությունների խաղաղ լուծման համար. նախագահ Սարգսյան

ԵՐԵՎԱՆ, 18 հունիսի. /Նովոստի-Արմենիա/. Ժողովուրդների ինքնորոշման իրավունքը հարգելը, ինչպես նաև միջազգային որոշումներն ու միջազգային իրավունքը հարգելը և երկխոսության կարևորության համատեղ համոզմունքի վրա հիմնված իրավական կամքը բավարար հիմք է աշխարհում բոլոր ճգնաժամերն ու հակամարտությունները խաղաղ ճանապարհով լուծելու համար, ասել է Սիրիայի նախագահ Բաշար Ալ-Ասադը նախօրեին՝ իր և իր տիկնոջ պատվին ՀՀ նախագահ Սերժ Սարգսյանի ու նրա տիկին Ռիտա Սարգսյանի կողմից տված պաշտոնական ընթրիքի ժամանակ:

«Այսպիսով մենք խրախուսում ենք այն դրական քայլերը, որոնց ականատես են եղել հայ-թուրքական հարաբերությունները, և արտահայտում ենք մեր պատրաստակամությունը այս հարաբերությունների ամրապնդմանը նպաստող որևէ ջանք գործադրելու համար»,- հինգշաբթի «Նովոստի-Արմենիա» գործակալության համար հայկական պետության ղեկավարի մամուլի ծառայությունից մեջբերեցին Սիրիայի նախագահի խոսքերը:

Ալ-Ասադը հույս է հայտնել, որ «կանգնած ենք նոր փուլի առջև, փուլ, որտեղ տեսնում ենք հույսի շող այն բանից հետո, երբ լսեցինք փոխադարձ հարգանքի վրա հիմնված երկխոսության կոչ անող մի նոր ձայն, սակայն մենք սպասում ենք, որ խոսքը ուղեկցվի գործով, և լուրջ աշխատանք սկսվի Ձեր տարածաշրջանի և մեր տարածաշրջանի խնդիրների արդար լուծմանը հասնելու համար»:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Թուրքիան երկկողմ հարաբերությունների հաստատաման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ.  իրագործված Եղեռնի ճանաչմանն ուղղված ջանքերից հրաժարվելը և ղարաբաղյան հիմնախնդրի լուծումը` հօգուտ Ադրբեջանի:

Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ  ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-