ԵՐԵՎԱՆ, 17 հունիսի. /Նովոստի-Արմենիա/. Իրավական հարցերի ԱԺ հանձնաժողովը հավանություն է տվել «Համաներում հայտարարելու մասին» ՀՀ նախագահի առաջարկին, «Նովոստի-Արմենիա» գործակալությանը հայտնեցին ՀՀ ԱԺ մամուլի ծառայությունից:
Ինչպես նշվում է հաղորդագրության մեջ, «ԱԺ կանոնակարգ» օրենքի 90-րդ հոդվածի 3-րդ կետի համաձայն` հունիսի 17-ին գումարվեց ԱԺ պետական-իրավական հարցերի մշտական հանձնաժողովի դռնփակ նիստը` Դավիթ Հարությունյանի նախագահությամբ:
«Հանձնաժողովը քննարկեց «Համաներում հայտարարելու մասին» ՀՀ նախագահի առաջարկությունը: Այն արժանացավ հանձնաժողովի դրական եզրակացությանը»,- ասվում է հաղորդագրության մեջ:
ՀՀ ԱԺ նախագահ Հովիկ Աբրահամյանը որոշում է ստորագրել հունիսի 19-ին երկրի խորհրդարանի արտահերթ նիստ գումարելու մասին, հայտնում է ԱԺ հասարակայնության հետ կապերի վարչությունը:
Ենթադրվում է, որ համաներումը կտարածվի Երևանում մարտի 1-2 դեպքերի ժամանակ հանցանքներ գործած անձանց վրա:
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։-0-
