ՀՀ խորհրդարանի շենքում կայացավ գերմանացի երաժիշտների եզրափակիչ համերգը
Գերմանացի տենոր Քրիստոֆ Շեբենի և դաշնակահար Ստյուարտ Էմերսոնի եզրափակիչ համերգը հունիսի 12-ին կայացավ ՀՀ խորհրդարանի շենքում, հայտնում է ԱԺ հասարակայնության հետ կապերի վարչությունը:
«Գերմանիայի շաբաթներ 2009» ծրագրի շրջանակներում տեղի ունեցած համերգի ժամանակ հնչեցին մեծանուն կոմպոզիտորներ Ֆելիքս Մենդելսոն Բարթոլդիի, Յոհաննես Բրամսի, Ֆրանց Շուբերտի և Ռիխարդ Շտրաուսի ստեղծագործություններից:
Համերգին զուգահեռ բացվել էր Հայաստանում ԳԴՀ նախկին դեսպան Հանս-Վուլֆ Բարթելսի` Հայաստանին նվիրված լուսանկարների ցուցահանդեսը:
Միջոցառմանը ներկա էին ԱԺ փոխնախագահ Սամվել Նիկոյանը, մշակույթի փոխնախարար Դավիթ Մուրադյանը, պատգամավորներ, դեսպաններ, միջազգային կազմակերպությունների ներկայացուցիչներ, ԱԺ աշխատակազմի անդամներ:
ԱԺ գիտության, կրթության, մշակույթի, երիտասարդության և սպորտի մշտական հանձնաժողովի նախագահ Արտակ Դավթյանը շնորհակալություն հայտնելով Հայաստանում ԳԴՀ դեսպանությանը և անձամբ դեսպան Անդրեա Վիկտորինին` հույս հայտնեց, որ նման գեղեցիկ միջոցառումները կլինեն շարունակական:
ՀՀ ԱԺ նախագահ Հովիկ Աբրահամյանի ուղերձում մասնավորապես ասվում էր, որ հայ-գերմանական կապերն ունեն փառահեղ պատմություն: Դեռևս Սրբազան Հռոմեական Կայսրության ժամանակաշրջանում արձանագրվել էին հայ-գերմանական սերտ շփումներ: «Գերմանիայի օրինակին պետք է հետևեն մեր հարևանները և սթափ վերագնահատեն իրենց պատմությունը»: Վերջում Աբրահամյանը հույս հայտնեց, որ հայ-գերմանական բարեկամությունը շարունակելու է վերընթաց զարգացում ապրել:
Իր հերթին Հայաստանում ԳԴՀ դեսպան Անդրեա Վիկտորինն իր խոսքում շնորհակալություն հայտնեց ԱԺ նախագահ Հովիկ Աբրահամյանին, ԱԺ գիտության, կրթության, մշակույթի և երիտասարդության հարցերի մշտական հանձնաժողովի նախկին եւ ներկա նախագահներ Արմեն Աշոտյանին եւ Արտակ Դավթյանին` նախաձեռնությանն ընդառաջելու և ջերմ ընդունելության համար, ինչը մեկ անգամ ևս հավաստում է երկու երկրների միջև առկա ջերմ հարաբերությունները, նաև` խորհրդարանական մակարդակով:
Համերգի նախաձեռնողներն էին Հայաստանում Գերմանիայի Դաշնային Հանրապետության դեսպանությունը և ՀՀ մշակույթի նախարարությունը:-0-
