Հայաստանը չի կարող դառնալ ԵվրԱզԷՍ-ի Մաքսային միության անդամ՝ տնտեսական կառույցների և շահերի անհամատեղելիության պատճառով. վարչապետ

Հայաստանը չի կարող ԵվրԱզԷՍ-ի նորաստեղծ եռակողմ Մաքսային միության անդամ դառնալ, քանի որ երկրի  տնտեսական կառուցվածքն ու շահերը չեն համընկնում Միության մասնակիցների տնտեսական շահերի հետ, այդ թվում նաև մաքսատուրքերի առումով։ Այս մասին լրագրողներին հայտարարեց ՀՀ վարչապետ Տիգրան Սարգսյանը՝ ամփոփելով ԵվրԱզԷՍ-ի միջպետական խորհրդի նիստին մասնակցելու նպատակով Մոսկվա կատարած իր այցի արդյունքները։

Ռուսաստանի, Բելառուսի և Ղազախստանի վարչապետները երեքշաբթի համատեղ հայտարարություն են ընդունել որպես միասնական մաքսային տարածք Առևտրի համաշխարհային կազմակերպությանը միանալու մտադրության մասին։ Մաքսային միությունը պետք է սկսի գործել 2010 թ.-ի հունվարի 1-ից, երբ երեք երկրների տարածքներում կներդրվի միասնական մաքսային սակագին, իսկ հաջորդ տարվա հուլիսի 1-ից ուժի մեջ կմտնի միասնական մաքսային օրենսգիրքը։ Բոլոր անհրաժեշտ ինտեգրացիոն ընթացակարգերը ծրագրվում է ավարտել 2011 թ.-ի կեսերին։

Սարգսյանն ասել է, որ Մաքսային միության մասնակից-երկրներում բարձր մաքսատուրքեր են գործում՝ այդ պետությունների տեղական արտադրողներին և տնտեսական ոլորտները (մեքենաշինություն, մետաղագործություն և բազմաթիվ այլ ոլորտներ) պաշտպանելու նպատակով, որոնք լուրջ ներուժ ունեն։

«Քանի որ մենք չունենք նմատանիպ ոլորտներ և մենք այդ արտադրանքի ներկրողն ենք, ապա մեզ շահեկան չէ կիրառել բարձր մաքսատուրքեր և նման կերպով սահմանափակել մեր առևտրային հնարավորությունները», - պարզաբանել է նա։

Այս կապակցությամբ ՀՀ կառավարության ղեկավարը նաև նշել է, որ Մաքսային միության ստեղծումն այդ երեք երկրների համար ընդլայնում է նրանց շուկաները, և նրանք համատեղ բանակցություններ են վարելու ԱՀԿ-ի հետ՝ այդ կազմակերպություն մուտք գործելու առնչությամբ։

«Քանի որ Հայաստանը, ինչպես և Ղրղզստանը, արդեն ԱՀԿ անդամ է, ապա մենք նման խնդիր չունենք։ Մենք մեր գործընկերներին հաջողություն ենք մաղթում այդ բանակցային գործընթացներում», - ընդգծել է Սարգսյանը։

ԱՀԿ-ն գործում է 1995 թ.-ի հունվարի 1-ից և ընդգրկում է 146 երկիր։ 2003 թ.-ի փետրվարի 5-ից Հայաստանը պաշտոնապես դարձել է Առևտրի համաշխարհային կազմակերպության 145-րդ անդամը։-0-