Հայաստանը մեծապես կարևորում է ԱՄՆ-ի հետ հարաբերությունների խորացումը. նախագահ

ԵՐԵՎԱՆ, 9 հունիսի. /Նովոստի-Արմենիա/. Հայաստանը մեծապես կարևորում է ԱՄՆ-ի հետ հարաբերությունների խորացումը, հայտարարեց Հայաստանի նախագահ Սերժ Սարգսյանը աշխատանքային այցով Հայաստանում գտնվող ԱՄՆպետքարտուղարի՝ Եվրոպայի և Եվրասիայի հարցերով տեղակալ Ֆիլիպ Գորդոնի հետ հանդիպման ժամանակ, հայտնում է երկրի ղեկավարի մամուլի ծառայությունը։

Սարգսյանի խոսքերով՝ Հայաստանը չափազանց կարևորում է Միացյալ Նահանգների հետ հարաբերությունների խորացումը և բարձր է գնահատում երկրի տնտեսության զարգացման, ժողովրդավարության ամրապնդման, տարածաշրջանում կայունության ապահովման ուղղությամբ ԱՄՆ կառավարության գործադրած ջանքերը:

Պետքարտուղարի տեղակալ Ֆիլիպ Գորդոնը նշել է, որ երկրորդ շաբաթն է, ինչ ստանձնել է պաշտոնը, և իր առաջին արտասահմանյան ուղևորությունը սկսում է Հայաստանից: Նա ասել է, որ ամերիկյան կողմը կարևորում է Հայաստանի հետ համագործակցության ընդլայումը, ինչպես նաև մեծ ուշադրությամբ հետևում է տարածաշրջանային զարգացումներին:

Նախագահ Սարգսյանը և պետքարտուղարի տեղակալ Գորդոնը հանգամանալի զրույց են ունեցել հայ-թուրքական հարաբերությունների կարգավորման գործընթացի վերաբերյալ:

Նշելով, որ սա պատմական հնարավորություն է, և հայ-թուրքական հարաբերությունների կարգավորումը բխում է թե Հայաստանի, թե Թուրքիայի և թե տարածաշրջանի շահերից, ԱՄՆ պետքարտուղարի տեղակալը վերահաստատել է այդ ուղղությամբ ձեռնարկվող քայլերին Միացյալ Նահանգների վարչակազմի անվերապահ աջակցությունը:

Կողմերը մտքեր են փոխանակել նաև Լեռնային Ղարաբաղի հիմնախնդրի կարգավորման վերաբերյալ:

Նախագահ Սարգսյանը հակիրճ ներկայացրել է խնդրի պատմությունը և պաշտոնական Երևանի դիրքորոշումը:

Հանրապետության նախագահը մեկ անգամ ևս շեշտել է, որ Հայաստանի հավատարիմ է հակամարտության խաղաղ կարգավորմանը և պատրաստ է մադրիդյան առաջարկությունների հիման վրա շարունակել բանակցել:
 

Հանդիպմանն անդրադարձ է եղել նաև «Հազարամյակի մարտահրավերներ» ծրագրի հետ կապված հարցերին:--0--