ԵՐԵՎԱՆ, 4 հունիսի. /Նովոստի-Արմենիա/. «Հարավկովկասյան երկաթուղի» ՓԲԸ-ն շահագրգռված է Իրան-Հայաստան երկաթուղային հաղորդակցության շինարարությանը մասնակցությամբ, հինգշաբթի հայտնեց ՀԿԵՈՒ գլխավոր տնօրեն Շևքեթ Շայդուլլինը «Նովոստի» միջազգային մամուլի կենտրոնում ունեցած ասուլիսի ժամանակ։
Երևանը մտադիր է ներգրավել Ռուսաստանին և տարբեր ֆինանսական կառույցների Իրան-Հայաստան երկաթուղային հաղորդակցության շինարարությանը։ Իրանական կողմը հայտարարել է Հայաստանին 400 մլն դոլարի չափով վարկ տրամադրելու պատրաստակամության մասին նախագծի իրականացման համար, ընդ որում՝ լիովին ապահովելով սեփական երկրի տարածքում երկաթուղային հաղորդակցության շինարարության ծախսերը։
«Մենք այս նախագծի հանդեպ անտարբեր չենք, քանի որ այն ճիշտ, հասկանալի և անհրաժեշտ ենք համարում։ Այսօր այն սկզբունքայնորեն մշակվում է «ՌԵՈՒ» ԲԲԸ մակարդակում և համապատասխան պետությունների կողմից»,- ասաց Շայդուլլինը։
Նա նշեց, որ արդեն տրված են համապատասխան ցուցումները, կատարվում է տեխնիկատնտեսական հիմնավորման վերամշակումը համատեղ «ՌԵՈՒ» ԲԲԸ-ի և ՀՀ տրանսպորտի և կապի նախարարության կողմից։
«Կարծում եմ, որ մոտ ժամանակներս կառավարության որոշմամբ կստեղծվի ձեռնարկություն, որը սկզբունքայնորեն կզբաղվի այս նախագծով, և տեսանելի կդառնա շահագրգիռ կողմերից յուրաքանչյուրի մասնակցությունը։ Մենք շահագրգռված ենք ու պատրաստ մասնակցելու և ապահովելու տվյալ նախագծի համապատասխան առաջխաղացումը»,- ասաց Շայդուլլինը։
Իրան-Հայաստան երկաթուղու կառուցման մասին վերջնական համաձայնագիրը ստորագրվել է ապրիլի 15-ին Թեհրանում՝ Իրանի ճանապարհների ու հաղորդակցությունների նախարար Համիդ Բիհբահանիի և ՀՀ տրանսպորտի և կապի նախարար Գուրգեն Սարգսյանի միջև: Երկաթուղու կառուցումը կարող է տևել չորսից հինգ տարի։
Իրան-Հայաստան երկաթուղու երկարությունը կկազմի շուրջ 470 կմ, որից 60 կմ-ը կանցնի Իրանի, իսկ մնացած մասը՝ Հայաստանի տարածքով։ Աշխատանքները կիրականացվեն մի քանի փուլով՝ ՏՏՀ նախագծի ուսումնասիրում, ֆինանսական աղբյուրների ճշտում, օպտիմալ երթուղու ընտրություն և երկաթուղու շինարարություն։
Իրան-Հայաստան երկաթուղին Հայաստանին թույլ կտա էներգառեսուրսների և այլ ապրանքների փոխադրման այլընտրանքային ուղուց օգտվել՝ ելք ստանալով դեպի արտաքին աշխարհ։ Ներկայում Հայաստանի երկաթուղային հաղորդակցությունն արտասահմանյան երկրների հետ կատարվում է միայն Վրաստանի տարածքով։
Նախնական տվյալներով՝ Իրան-Հայաստան երկաթուղու կառուցման ներդրումները կկազմեն 2 միլիարդ դոլար։ Իրան-Հայաստան երկաթուղու կառուցման նախագծի հարցում հետաքրքրություն են դրսևորում Համաշխարհային Բանկը և Զարգացման ասիական բանկը։-0-
