ԵՐԵՎԱՆ, 3 հունիսի. /Նովոստի-Արմենիա/. 2008 թ.-ի մարտի 1-2 դեպքերի փաստահավաք խմբի անդամների որպես անկախ փորձագետներ գործելու անկարողությունը հանգեցրեց խմբի գործունեության ձախողմանը, կարծում է ՀՀ նախագահի մամուլի քարտուղար Սամվել Ֆարմանյանը։
«2008 թ.-ի մարտի 1-2 դեպքերի փաստահավաք խմբի անդամները առաջադրված լինելով քաղաքական ուժերի կողմից, ցավոք սրտի, չկարողացան ձերբազատվել իրենց քաղաքական օրակարգից և գործել որպես իրապես անկախ փորձագետներ, հանգամանք առանց որի ինքնին խնդրահարույց է դառնում փաստահավաք խմբի գոյությունը, ինչն էլ իր հերթին բերեց խմբի ներսում ստեղծված ներկա մթնոլորտին, և ըստ էության, խմբի գործունեության ձախողմանը»,- «Նովոստի-Արմենիա» գործակալության համար մեջբերեցին նախագահի մամուլի քարտուղարի խոսքերը:
Ֆարմանյանի խոսքով, փորձագետների անկախ փաստահավաք խմբի ձևավորումը հանրապետության նախագահ Սերժ Սարգսյանի քաղաքական կամքի և եվրոպական կառույցների հետ արդյունավետ համագործակցության դրսևորումն էր:
«Հասարակական հնչեղություն ունեցող խնդիրների ուսումնասիրումը նման ձևաչափով նախադեպային էր»,- ասել է նա:
«Մենք հավատացած էինք, որ պետական պաշտոնական շրջանակներից դուրս ստեղծված և անկախ փորձագետներից կազմված փաստահավաք խումբը Նախագահի կարգադրությամբ սահմանված մանդատի շրջանակներում կարող էր բավարարել հանրային ակնկալիքները և լուրջ աջակցություն ցուցաբերել խորհրդարանական ժամանակավոր հանձնաժողովին` անցյալ տարեսկզբին տեղի ունեցած ողբերգական իրադարձությունների և դրանց պատճառների վերհանման հարցում»,- ասել է Ֆարմանյանը:
Սակայն նրա խոսքով, ժամանակը ցույց տվեց, որ առաջադրված լինելով քաղաքական ուժերի կողմից, փաստահավաք խմբի անդամները, ցավոք սրտի, չկարողացան ավարտին հասցնել իրենց գործը։
Մարտյան դեպքերի ուսումնասիրության ԱԺ ժամանակավոր հանձնաժողովը ստեղծվել է 2008թ. հունիսի 16-ին ԵԽԽՎ պահանջների շրջանակներում՝ Հայաստանում ժողովրդավարական ինստիտուտների վիճակի թիվ 1609 բանաձևի համաձայն:
Նախագահական ընտրություններում պարտություն կրելուց հետո հայկական արմատական ընդդիմությունը՝ նախկին նախագահ Լևոն Տեր-Պետրոսյանի գլխավորությամբ, փետրվարի 20-ից Երևանի կենտրոնում բողոքի ցույցեր էր անցկացնում, որոնք մարտի 1-2-ին վերածվեցին անկարգությունների ու բախումների՝ ցուցարարների և ոստիկանության աշխատակիցների միջև, ինչի արդյունքում վիրավորվեց ավելի քան 200 մարդ, տասը հոգի մահացավ և ավելի քան 100-ը ձերբակալվեց։ -0-
