Սոցիոլոգ, «Սոցիոմետր» սոցիոլոգիական հետազոտությունների անկախ կենտրոնի ղեկավար Ահարոն Ադիբեկյանը կարծում է, որ «Սոցիոմետրի» կանխատեսումները Երևանի ավագանու խորհրդի ընտրությունների կապակցությամբ արդարացան։
Ադիբեկյանը ցանկություն հայտնեց հանդիպելու ընտրություններին մասնակցող կուսակցությունների ներկայացուցիչների հետ, «ովքեր իրենց համար ահռելի քանակությամբ ձայներ էին կանխանշում և մեղադրում իրեն, որ նա, իբր, ուսումնասիրություններ է կատարում արդյունքների ամփոփումից հետո»։
Փորձագետը նշեց, որ կենտրոնի կանխատեսումները Ավագանու Խորհրդի ընտրությունների վերաբերյալ իրականացվել են ավանդական միջոցներով և մեծ մասամբ համընկել են ընտրությունների արդյունքների հետ՝ նկատի ունենալով 3 տոկոսի անճշտւոթյունը։
«Մեր հարցումների համաձայն՝ ընտրական ակտիվությունը պետք է տատանվեր 53-ից մինչև 35 տոկոսի սահմաններում։ Մոնիտորինգի արդյունքների համաձայն՝ բացարձակ առաջատարը Հայաստանի Հանրապետական կուսակցությունն էր։ Եվ նույնիսկ 5-տոկոսանոց անճշտությունները հաշվի առնելով՝ ՀՀԿ և «Բարգավաճ Հայաստան» կուսակցության առավելությունն այնքան մեծ էր, որ կարելի էր հաստատ պնդել, որ կուսակցության տվյալները միանշանակ առաջատար կլինեն ընտրությունների արդյունքներով»,- նշեց Ադիբեկյանը։
«Սոցիոմետրի» դիտարկման արդյունքներով՝ մայիսի 14-ի դրությամբ Հայաստանի Հանրապետական կուսակցության վարկանիշը կազմել է 54 տոկոս, երկրորդ տեղում վարկանիշով հետևել է «Բարգավաճ Հայաստանը»՝ 21 տոկոս, այնուհետև Հայ ազգային կոնգրեսը 14 տոկոսով։ Մնացած քաղաքական ուժերի վարկանիշը համագումարում չի գերազանցել 10 տոկոսը։
Կենտրոնական ընտրական հանձնաժողովի տվյալներով, Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը:
Ադիբեկյանն ընդգծեց նաև, որ ՀԱԿ հայտարարությունը Ավագանու Խորհրդի բոլոր մանդատներից հրաժարվելու մասին զարմանք չի առաջացնում՝ նկատի առնելով, որ վերջիններս վաղուց որդեգրել են «եթե մենք չենք հաղթել ընտրություններում, ապա դրանք կեղծված են» սկզբունքը։
Սոցիոլոգն անընդունելի է համարում նման քաղաքական գիծը Հայաստանի պես փոքր երկրում։ -0-
