Իշխանամետ և ընդդիմադիր ուժերը պետք է պատրաստ լինեն ընդունել մայիսի 31-ի ընտրությունների արդյունքները

Իշխանամետ և ընդդիմադիր ուժերը պետք է պատրաստ լինեն ընդունել մայիսի 31-ին  Երևանում անցակցվող Ավագանու խորհրդի ընտրությունների արդյունքները, հինգշաբթի լրագրողներին ասաց ՀՀ նախագահ Սերժ Սարգսյանը:

Մայիսի 31-ին տեղի կունենան Երևանի Ավագանու խորհրդի ընտրությունները: «Երևանում տեղական ինքնակառավարման մասին» նոր օրենքի համաձայն նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։

Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի 50%՝ գումարած մեկ ձայն:

«Որպես երկրի նախագահ՝ ես ընտրությունները դիտարկում եմ որպես գործընթաց, որը պետք է ընթանա օրենքի և օրինականության շրջանակներում: Այս կապակցությամբ ես կարծում եմ, որ թե իշխանամետ, թե ընդդիմադիրը ուժերը պետք է պատրաստ լինեն ընդունել ընտրությունների արդյունքները»,- ասաց նախագահը Սարդարապատում, որտեղ նա մասնակցում էր Առաջին հանրապետության օրվա կապակցությամբ կազմակերպված միջոցառումներին:

Միաժամանակ, երկրի ղեկավարը նշեց, որ նրա՝ որպես Երևանի բնակչի և Հանրապետական կուսակցության ղեկավարի նախապատվությունը հայտնի է։ «Ես ուրախ եմ, որ Հայաստանի Հանրապետական կուսակցությունը կարողացավ կազմակերպված անցնել այս ժամանակահատվածը և մոտենալ ընտրություններին լավ հնարավորություններով` նշելով,  որ հասարակությունում այդ փաստը ոչ ոք կասկածի տակ չի դնում»,- ասաց նախագահը։

Պետության ղեկավարը նշեց նաև, որ ուրախ է այն առումով, որ ՀՀԿ կոալիցիոն գործընկեր «Բարգավաճ Հայաստան» կուսակցությունը նույնպես շատ պատասխանատու կերպով է մոտեցել ընտրություններին, և այսօր այն առաջատարների թվում է։ «Այսօր ոչ ոք չի կասկածում, որ «Բարգավաճ Հայաստանն իր դերը կունենա Երևանի ղեկավարման գործում»,- ասաց երկրի ղեկավարը։

Նա ցանկություն հայտնեց, որպեսզի նաև մյուս կոալիցիոն գործընկերը՝ «Օրինաց երկիրը», նույնպես հաջողություն ունենա ընտրություններում։ «Նույնը վերաբերում է «Դաշնակցություն» կուսակցությանը։ Կարծում եմ, որ, լինելով կառուցողական ընդդիմություն, Դաշնակցությունը մեծ դեր է խաղում Երևանի կառավարման հարցում, և կարծում եմ, որ նրա մասնակցությունը մայրաքաղաքի կառավարմանը միայն օգուտ կբերի մեր երկրին, մասնավորապես, Երևանին»,- ասաց նախագահը։ -0-