«Նոր Հայաստան» հասարակական կազմակերպությունը պահանջում է ԱԳՆ ղեկավարի հրաժարականը

ԵՐԵՎԱՆ, 22 մայիսի. /Նովոստի-Արմենիա/. «Նոր Հայաստան» հասարակական կազմակերպությունը պահանջում է ԱԳՆ ղեկավար Էդվարդ Նալբանդյանի հրաժարականը՝ կապված հայ-թորքական հարաբերությունների կարգավորման գործընթացի հետ։

«Նոր Հայաստանը» ուրբաթ ակցիա է անցկացրել ԱԳՆ շենքի մոտ, որի ընթացքում նամակ է գցել հայկական արտաքին քաղաքական գերատեսչության շենքի ընդունարանում դրված արկղի մեջ։

Նամակում նշվում է, որ «հայ-թուրքական հարաբերությունների հաստատման գործընթացները հարցականի տակ են դնում ՀՀ ազգային անվտանգությունը»։

«Չնայած այն բանին, որ մեր կազմակերպությունը դեռևս 5 տարի առաջ հայտարարել էր այն մասին, որ չի մասնակցի ոչ մի քաղաքական գործընթացի, այս իրավիճակն այնքան վտանգավոր է ողջ ազգի համար, որ մենք այլընտրանք չունենք»,- ասել է «Նոր Հայաստան» հասարակական կազմակերպության տնօրեն Էլեոնորա Մանանդյանը։

Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Պաշտոնական Երևանը հայտարարում է, որ պատրաստ է հարաբերություններ հաստատել Թուրքիայի հետ՝ առանց նախապայմանների։ Սակայն Թուրքիան երկկողմ հարաբերությունների հաստատաման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ.  իրագործված Եղեռնի ճանաչմանն ուղղված ջանքերից հրաժարվելը և ղարաբաղյան հիմնախնդրի լուծումը` հօգուտ Ադրբեջանի:

Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ  ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-