ԵՐԵՎԱՆ, 20 մայիսի. /Նովոստի-Արմենիա/. Օպերատիվ վիճակագրական տվյալների համաձայն՝ Հայաստանի ՀՆԱ-ն 2009թ.-ի հունվար-ապրիլ ամիսներին կրճատվել է 9,7 տոկոսով։ Ինչպես «Նովոստի-Արմենիա» գործակալությանը տեղեկացրեցին ՀՀ Ազգային վիճակագրական ծառայությունից, ՀՆԱ-ի ծավալը կազմել է 638,9 միլիարդ դրամ (1894,4 միլիոն ԱՄՆ դոլար)։
Վիճակագրական տվյալների համաձայն՝ 2009թ.-ի հունվար-ապրիլ ամիսներին, 2008թ.-ի նույն ժամանակահատվածի համեմատ, գրանցվել է 2,3 տոկոսի սպառողական գնաճ։ Միաժամանակ 2008թ.-ի դեկտեմբերի համեմատ՝ գրանցվել է տվյալ ցուցանիշի աճ 3,9 տոկոսով։
Հաշվետու ժամանակաշրջանում արդյունաբերական ապրանքների արտադրողների գները կրճատվել են 5,9 տոկոսով նախորդ տարվա նույն ժամանակաշրջանի համեմատ։
Հաշվետու ժամանակաշրջանում 177 միլիարդ դրամի (524,7 միլիոն ԱՄՆ դոլար) արդյունաբերական արտադրանք է արտադրվել, ինչը 11,1 տոկոսով պակաս է նախորդ տարվա նույն ժամանակաշրջանի համեմատ։
2009թ. հունվար-ապրիլ ամիսների արդյունքներով՝ Հայաստանի արտաքին առևտրաշրջանառության ծավալը կազմել է 1069,1 մլն ԱՄՆ դոլար՝ 2008թ. ժամանակաշրջանի համեմատ կրճատվելով 30 տոկոսով։
Պետբյուջեի համաձայն՝ 2009թ. ՀՆԱ աճը Հայաստանում նախատեսված է 9,2 տոկոսի մակարդակում։-0-
