Հայաստանը միջազգային կառույցներում լիարժեք չի ներկայացնում ղարաբաղյան հակամարտության կարգավորման հարցը. ընդդիմադիր պատգամավոր

Հայաստանը միջազգային կառույցներում լիարժեք չի ներկայացնում ղարաբաղյան հակամարտության կարգավորման հարցը, երեքշաբթի խորհրդարանում հայտարարել է «Ժառանգություն» ընդդիմադիր խմբակցության քարտուղար Լարիսա Ալավերդյանը։

«Հայաստանը լիարժեք ներկայացված չէ միջազգային կառույցներում, հատկապես՝ ղարաբաղյան հակամարտության կարգավորման հարցի տեսակետից, ինչի պատճառով շատ ատյաններում հայկական կողմի համար անբարենպաստ որոշումներ են ընդունվում», - ասել է Ալավերդյանը։

Նրա կարծիքով՝ հայկական պատվիրակությունների ներկայացուցիչները չեն իրականացնում իրենց վրա դրված պարտականությունները ղարաբաղյան հակամարտության կարգավորման հարցում։

Այս կապակցությամբ նա կոչ է արել հանդիպում կազմակերպել խորհրդարանական բոլոր պատվիրակությունների անդամների մասնակցությամբ, որի ժամանակ կմշակվի ղարաբաղյան հակամարտության կարգավորման հարցը ներկայացնելու վերաբերյալ ընդհանուր դիրքորոշում։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-