«Նաիրիտ» գործարանի ղեկավարությունը Երևանյան բանկում հաշիվներ է բացել հրդեհի ժամանակ զոհվածների ընտանիքներին օգնելու համար

ԵՐԵՎԱՆ, 15 մայիսի. /Նովոստի-Արմենիա/. «Նաիրիտ» գործարանի ղեկավարությունն ու արհմիությունը ուրբաթ Երևանյան բանկում հաշիվներ է բացել հրդեհի ժամանակ զոհված 4 աշխատակիցների ընտանիքներին օգնելու համար, հայտնում է «Նաիրիտ» գործարանի մամուլի ծառայությունը։

«Նաիրիտ գործարան» ՓԲԸ ղեկավարությունն ու արհմիությունը գործարանի կոլեկտիվի առաջարկով ստեղծել են հոգաբարձուների խորհուրդ` մայիսի 14-ին Նաիրիտում տեղի ունեցած վթարի արդյունքում զոհված 4 աշխատակիցների ընտանիքներին աջակցելու համար հանգանակություն կազմակերպելու նպատակով:

Այսօր «Արարատ» բանկում  «Նաիրիտ Գործարան» ՓԲԸ արհմիության կողմից բացվել է երկու հաշվեհամար` դրամային հաշվեհամարն է 1510001664630100 (AMD ), դոլարային հաշվեհամարն է 1510001664630101 (USD)։

Անհատները և կազմակերպությունները կարող են փոխանցել ցանկացած չափի գումար` հայկական դրամ կամ ամերիկյան դոլար:

Տարածաշրջանում կաուչուկի խոշորագույն «Նաիրիտ» գործարանում պայթյուն է տեղի ունեցել նախօրեին տեղական ժամանակով երեկոյան ժամը վեցի սահմաններում, երկրորդ հերթափոխի աշխատանքի սկզբին։ Հրդեհի հետևանքով զոհվել է գործարանի չորս աշխատակից։

Երևանի «Նաիրիտ» քիմգործարանում տեղի ունեցած հրդեհի փաստի առթիվ հարուցվել է քրեական գործ ՀՀ Քրեական օրենսգրքի երկու հոդվածի՝ 231-րդ հոդվածի (պայթյունավտանգ օբյեկտներում անվտանգության կանոնների խախտելը, եթե մարդու առողջությանն անզգուշությամբ պատճառվել է ծանր կամ միջին ծանրության վտաս) և 285-րդ հոդվածի (վտանգավոր քիմիական կամ կենսաբանական այլ ազդակների կամ թունավոր նյութերի հետ վարվելու ընթացքում անվտանգության կանոնները խախտելը, եթե դա անզգուշությամբ մարդու առողջությանը վնաս է պատճառել, առաջացրել է համաճարակներ կամ անասնահամաճարակներ կամ այլ ծանր հետևանքներ) հատկանիշներով:

«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ -0-