Երևանի քիմգործարանում տեղի ունեցած խոշոր հրդեհը մարվել է. ՀՀ ԱԻՆ

Տարածաշրջանի խոշորագույն երևանյան «Նաիրիտ» քիմգործարանում տեղի ունեցած խոշոր հրդեհը, որի հետևանքով զոհվել է երեք մարդ, մարվել է, տեղեկացրել է ՀՀ ԱԻՆ Փրկարար ծառայության պետի խորհրդական Նիկոլայ Գրիգորյանը։

Հրդեհին նախորդել է հզոր պայթյուն, որը որոտացել է տեղական ժամանակով ժամը 18:00-ի սահմաններում: Պայթյունից հետո բուժօգնության համար դիմել է մոտ 20 մարդ՝ թեթև այրվածքներով և ծխից թունավորմամբ:

«Գործարանում տեղի ունեցած հրդեհն արդեն մարվել է։ Ներկա պահին երեք մարտական հաշվարկներ հրդեհի օջախի սառեցման աշխատանքներ են տանում։ Ծուխը խոչընդոտում է հրշեջների աշխատանքին, թանձրացած ծխի պատճառով դժվար է շնչել, սակայն գործարանի տարածքում աշխատանքները շարունակվում են», - ասել է Գրիգորյանը։

Նա կրկին կրկնեց, որ պայթյունի և հրդեհի հետևանքով վնասակար և թունավոր արտանետումներ չեն գրանցվել:

Գրիգորյանը նաև տեղեկացրեց, որ վերջին տվյալներով՝ պատահարի հետևանքով երեք մարդ զոհվել է: Եվս մեկ աշխատակից համարվում է անհետ կորած։

Ավելի վաղ Գրիգորյանը տեղեկացրել էր, որ իրավապահ մարմինները հրդեհի փաստի առթիվ քրեական գործ են հարուցել։ Գործակալության զրուցակիցը դժվարացել է ասել հարուցված գործի հոդվածը։ Նա հրաժարվել է նաև հրապարակել տեղի ունեցած դեպքի հնարավոր պատճառները։

Գրիգորյանի խոսքերով՝ ձեռնարկությունում ստեղծվել է փորձագիտական խումբ, որը զբաղվում է հրդեհի պատճառների ուսումնասիրմամբ։ Բացի այդ, ստեղծվել է քննչական խումբ։

«Նաիրիտ» գործարանի մամուլի քարտուղար Անուշ Հարությունյանը «ՌԻԱ Նովոստիին» տեղեկացրել է, որ իրավիճակը լիովին վերահսկվում է։

«Վտանգավոր նյութերի արտանետում չի եղել։ Այս պահի դրությամբ զոհվածների թիվը երեքն է, գործարանի մեկ աշխատակցի մասին տեղեկությունները ճշտվում են։ Ութ մարդ տուժել է, որոնցից չորսը գործարանի աշխատակիցներ են, իսկ մնացածը՝ փրկարարներ և հրշեջներ», - ասել է Հարությունյանը։

Նրա խոսքերով՝ գործարանի աշխատակիցներից ստեղծվել է մասնագիտացված խումբ՝ պատահարի հանգամանքներն ու հետևանքները բացահայտելու համար։

Փրկարար ծառայության տեղեկատվության համաձայն՝ հրդեհի հետևանքով վնասակար և թունավոր արտանետումներ չեն գրանցվել։ Արտակարգ իրավիճակների նախարար Մհեր Շահգելդյանն իր հերթին ասաց, որ  պայթյունի հետևանքով քաղաքացիների տարհանման անհրաժեշտություն չի տեսնում:

«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ --0—