ՀՀ կառավարությունը ճգնաժամին դիմակայելու նոր առաջարկությունների փաթեթ է մշակում, նախօրեին տեղեկացրել է ՀՀ վարչապետ Տիգրան Սարգսյանը՝ ելույթ ունենալով ՀՀ արդյունաբերողների և գործարարների միության 5-րդ նստաշրջանի ժամանակ։
«Իրավիճակը բավական արագ է փոփոխվում, և հասկանելի է, որ իրագործված միջոցառումները դեռևս բավարար չեն համաշխարհային ճգնաժամի բացասական ազդեցությունը կանխելու համար։ Մենք ծրագրում ենք մշակել փորձություններին դիմակայելու նոր առաջարկությունների փաթեթ», - ասել է Սարգսյանը։
Մասնավորապես, նրա խոսքերով, կառավարությունը նախատեսում է նոր պայմաններ ստեղծել վարկեր ստանալու և վարկային միջոցներ ներգրավելու համար, այդ թվում նաև արտաքին պարտքի տեսքով, ինչը պետք է Հայաստանում հանգեցնի տոկոսադրույքների կրճատման, ինչպես նաև վարկերի մատչելիության բարձրացման։
Վարչապետը նշել է, որ կառավարությունը քննարկում է նաև խոշոր բիզնեսին աջակցելու հնարավորությունները, մասնավորապես, քննարկվում են Զանգեզուրի մղնձամոլիբդենային կոմբինատի խնդիրները, որի գործունեությունը համակարգաստեղծ նշանակություն ունի պետության տնտեսության համար, ինչպես նաև կարևոր սոցիալական նշանակություն՝ տարածաշրջանի համար։
«Մենք լրացուցիչ միջոցներ կտրամադրենք Փոքր և միջին բիզնեսի աջակցման ազգային կենտրոնին, որը ֆինանսավորվում է պետբյուջեից և ճգնաժամի պայմաններում առանձնահատուկ նշանակություն է ստանում, մենք պետք է ընդլայնենք նրա վարկային հնարավորությունները», - ասել է Սարգսյանը։
Նրա խոսքերով, կառավարությունը ծրագրում է նաև կրտուկ ընդլայնել Կենտրոնական բանկին առընթեր Գերմանահայկական հիմնադրամի ֆինանսական հնարավորությունները, ինչը թույլ կտա ավելացնել փոքր և միջին բիզնեսի վարկավորման ծավալները և առևտրային բանկերի ֆինանսական միջոցները։
«Տնտեսական բարեփոխումներն այն կարևոր լծակն է, որը թույլ կտա հաղթահարել համաշխարհային ճգնաժամի ազդեցության հետևանքներն ու դուրս գալ դրանից ավելի ամուր և կայուն տնտեսական համակարգով», - ընդգծել է ՀՀ վարչապետը։-0-
