Համաշխարհային բանկը Հայաստանին 25 միլիոն դոլարի վարկ կտրամադրի երկրորդ կրթական ծրագրի համար

Համաշխարհային բանկի տնօրենների խորհուրդը հաստատել է Հայաստանին 25 միլիոն ԱՄՆ դոլարի վարկի տրամադրումը «Կրթության որակ և համապատասխանություն» երկրորդ ծրագրի համար, ասվում է չորեքշաբթի «Նովոստի-Արմենիա» գործակալություն ստացված Համաշխարհային բանկի մամուլի հաղորդագրության մեջ։

Վարկը տրամադրվում է Միջազգային զարգացման ընկերակցության (IDA) պայմաններով՝ 40 տարի ժամկետով, տասը տարի արտոնյալ ժամանակահատվածով՝ տարեկան 0,75 տոկոսադրույքով և կաջակցի կրթության որակի և համապատասխանության զարգացմանը։

Տեղեկատվության համաձայն՝ այս ծրագիրը Համաշխարհային բանկի կողմից Հայաստանում կրթական բարեփոխումներին աջակցելու հանձնառության երկրորդ ծրագրի երկրորդ փուլն է։

Ծրագիրն ուղղված է բարելավելու միջնակարգ կրթության ուսումնական պլանը, դասավանդման եղանակները, տարրական կրթության մակարդակ ներգրավվող երեխաների պատրաստվածությունն ու Հայաստանի բարձրագույն կրթության համակարգի ինտեգրմանը Եվրոպական բուհական կրթության ոլորտին։

«Այս նոր նախագիծն արժեք է ավելացնում մինչ այս անցակցվող հայկական բարեփոխումներին։ Միաժամանակ ընդլայնվում է սկզբնական օրակարգն, ինչպես նաև ներառված է նախադպրոցական և բարձրագույն կրթությունը», - տեղեկատվության մեջ մեջբերվում է ՀԲ թիմի ղեկավար Խուան Մանուել Մորենոյի խոսքերը։

Նրա խոսքերով՝ այս նախագիծը համապարփակորեն կօժանդակի նախադպրոցական, միջնակարգ և բարձրագույն կրթության բարեփոխումներն արագացնելու կառավարության ջանքերին՝ չնայած գլոբալ տնտեսական ճգնաժամի անբարենպաստ հետևանքներին։

ՀԲ փորձագետների կարծիքով՝ այս նախագիծը կօգնի դիմակայել կրթական համակարգում ճգնաժամային մարտահրավերներին։

Համաշխարհային բանկի՝ 19 միլիոն դոլարի առաջին վարկը, որը նախատեսված էր «Կրթության որակ և համապատասխանություն» ծրագրի համար, հաշվարկված էր 2004-2008 թթ.-ի համար։ Ծրագիրը բաղկացած էր չորս տարրերից՝ ընդհանուր կրթության և գնահատման համակարգի բարելավում, դպրոցներում նոր կրթական տեխնոլոգիաների ներդրում, ուսուցիչների մասնագիտական կատարելագործում, կրթական համակարգի կառավարման արդյունավետության բարձրացում։

Հայաստանի հետ համագործակցության ժամանակահատվածում 1992 թ.-ից ի վեր Համաշխարհային բանկը հանրապետությանը 1,187 միլիարդ ԱՄՆ դոլարի վարկ է տրամադրել։-0-