Ֆրանսիան կոչ է անում Բաքվին ու Երևանին առաջխաղացման հասնել Ղարաբաղյան կարգավորման հարցում
ԵՐԵՎԱՆ, 12 մայիսի. /Նովոստի-Արմենիա/. Ֆրանսիան, որը Ռուսաստանի և ԱՄՆ-ի հետ ԵԱՀԿ ՄԽ համանախագահ է, կոչ է անում Բաքվին ու Երևանին առաջխաղացման հասնել Ղարաբաղյան հակամարտության կարգավորման հարցում, ասվում է Ֆրանսիայի արտաքին քաղաքական գերատեսչության հայտարարության մեջ, որը երեքշաբթի տրամադրվել է «ՌԻԱ Նովոստիին»։
«Ֆրանսիան ուրախ է մայիսի 7-ին Պրահայում կայացած Իլհամ Ալիևի և Սերժ Սարգսյանի հանդիպման համար՝ համանախագահ երկրների նախաձեռնությամբ և Արևելյան գործընկերություն գագաթնաժողովի ընձեռած հնարավորությամբ: Սա Ադրբեջանի և Հայաստանի նախագահների չորրորդ հանդիպումն է մեկ տարուց էլ ավելի փոքր ժամանակահատվածում։ Այս հանդիպումը ներկայիս բանակցային գործընթացի աշխուժության ապացույցն է և հաստատում է նախագահների միջև հաստատված հարաբերությունների կառուցողական բնույթը։ Հանդիպումը հնարավորություն է տվել հստակ սահմանել մի շարք հարցեր, որոնցով հնարավոր են փոխհամաձայնություններ 2007 թ.-ի վերջին Մադրիդում համանախագահների կողմից ներկայացված դրույթներով»,- ասվում է հայտարարության մեջ։
«ԱՄՆ-ի և Ռուսաստանի հետ մեկտեղ Ֆրանսիան ևս կոչ է անում հակամարտության կողմերին ավելի առաջ գնալ հերթական հանդիպումների ժամանակ, այդ թվում հունիսի սկզբին Սանկտ-Պետերբուրգի հանդիպման ժամանակ»,- նշվում է փաստաթղթում։
Փաստաթղթում հիշեցվում է նաև, որ մայիսին կողմերի միջև հրադադարի ռեժիմի մասին փաստաթղթի 15 տարին լրացավ, և կոչ է արվում «ստույգ կատարել հրադադարի մասին փաստաթղթի և դրա ամրապնդմանն ուղղված հաջորդ փաստաթղթերի դրույթները»։ -0-
