ԱՄՀ-ն 2009թ.-ին համաշխարհային տնտեսության անկում է կանխատեսում -1,3 տոկոսի չափով և որոշակի վերականգնում միայն 2010թ.-ին՝ մինչև 1,9 տոկոս
ԵՐԵՎԱՆ, 11 մայիսի. /Նովոստի-Արմենիա/. Արժույթի միջազգային հիմնադրամը 2009թ.-ին համաշխարհային տնտեսության անկում է կանխատեսում -1,3 տոկոսի չափով և որոշակի վերականգնում միայն 2010 թ.-ին՝ մինչև 1,9 տոկոս, երկուշաբթի Երևանում հայտարարեց ԱՄՀ փոխնախագահ Ռաթնա Սահայը (IMF Deputy Director Ratna Sahay)՝ ներկայացնելով «Տարածաշրջանի տնտեսական հեռանկարները. «Կովկաս և Կենտրոնական Ասիա» զեկույցը։
«Համաշխարհային ճգնաժամն ամբողջ աշխարհում արդեն անցել է տնտեսության իրական հատված, ինչի պատճառով շատ շուկաներ գտնվում են ճնշված վիճակում, պահպանվում է լարվածության բարձր մակարդակը բարձր ռիսկերի առկայության դեպքում»,- ասաց Սահայը։
Նրա խոսքերով, ԱՄՀ-ն համաշխարհային տնտեսության կորուստ է կանխատեսում 2009-2011 թ.-ին 4 տրլն դոլարի չափով։
«ԱՄՀ-ն ակնկալում է, որ համաշխարհային տնտեսությունը 2010թ.-ին աստիճանաբար կվերականգնվի, սակայն ամեն ինչ կախված կլինի խոշոր պետությունների դիրքորոշումից, մասնավորապես, ֆինանսական պայմանների կայունացմանն ու պահանջարկի խթանմանն ուղղված գործողությունների և համակարգված քաղաքականության կազմակերպման հնարավորությունից»,- ասաց Սահայը։
Նա նշեց, որ չնայած պետությունների բազմաթիվ ջանքերին, համակարգային ռիսկերը շարունակում են բարձր մակարդակում մնալ, թեպետ վերջին տվյալները վկայում են տնտեսական անկման մեղմացման հնարավորության մասին։
Շուկայի ռիսկերի թվում նա նշեց հակաճգնաժամային քայլերի իրականացման հնարավոր ուշացումը, զարգացած տնտեսություններում դեֆոլտի սպառնալիքի աճը, մտավախությունը պետությունների հարկաբյուջետային կայունության հարցում, պետական մակարդակում առևտրային ու տնեսական պրոտեկցիոնիզմի ռիսկերը։
Նրա խոսքերով, 2008թ.-ի արդյունքներով արտահանման կրճատման ցուցանիշները «կցնցեն» և արդեն իսկ ծանրորեն անդրադարձել են զարգացող երկրների վրա, չնայած վերջին եռամսյակում արտահանման իրավիճակն աշխարհում ինչ-որ չափով բարելավվել է։
«Իրավիճակի կարգավորման համար անհրաժեշտ է տնտեսությունում համակարգել գործողությունները պետական մակարդակով, խթանել պետբյուջեն և մաքրել շուկան։ Ընդ որում, եթե նման քայլերն ուշանան, ապա հնարավոր է աշխարհում լուրջ արժեզրկում և տարբեր երկրների պետական պարտքի աճ գրանցվի»,- ասաց Սահայը։
ԱՄՀ-ում որոշակի մտահոգություն է առաջ բերում պետական պրոտեկցիոնիզմն ու տեղական արտադրողների աջակցությունը, ինչը սահմանափակում է ապրանքի ազատ ներկրման ու արտահանման հնարավորությունները։
«Այնուամենայնիվ, ԱՄՀ-ն հույս ունի, որ համաշխարհային տնտեսության առաջատարները կմիավորեն ջանքերը գործողությունների համակարգման համար»,- ասաց Սահայը՝ հույս հայտնելով, որ մինչև մյուս տարի տնտեսական իրավիճակի միտումներն աշխարհում կկայունանան։ -0-
