Երևանում բացվել է թրաֆիքինգի դեմ պայքարի աջակցության ռեսուրս-կենտրոն
ԵՐԵՎԱՆ, 7 մայիսի. /Նովոստի-Արմենիա/. Հինգշաբթի Երևանում ԵԱՀԿ երևանյան գրասենյակի ներկայացուցիչների, ինչպես նաև ԱՄՆ-ի, Գերմանիայի ու Ֆրանսիայի դեսպանների ներկայությամբ կայացավ թրաֆիքինգի դեմ պայքարի աջակցության ռեսուրս-կենտրոնի բացումը։
«Կենտրոնի բացումը թրաֆիքինգի դեմ պայքարի համակարգման օպտիմալացման, տեղեկատվության մատչելիության աստիճանի բարձրացման, տվյալ հանցագործության դեմ պայքարի համար համակարգված մոտեցումների մշակման և թրաֆիքինգի զոհերի պաշտանության նպատակ ունի»,- բացման արարողության ժամանակ ասաց ԵԱՀԿ երևանյան գրասենյակի ղեկավար Սերգեյ Կապինոսը։
Նրա խոսքերով, ԵԱՀԿ երևանյան գրասենյակը թրաֆիքինգի դեմ պայքարի մեծ փորձ ունի, իսկ թրաֆիքինգի դեմ պայքարի հարցերով ԵԱՀԿ հատուկ ներկայացուցիչ Էվա Բյոդեի այցը Երևան կնպաստի քաղաքացիական հասարակության և այս հանցագործության դեմ պայքարում ընդգրկված բոլոր մարմինների համատեղ աշխատանքների համակարգմանը։
Կապինոսը հիշեցրեց, որ Հայաստանն արդեն վավերացրել է թրաֆիքինգի դեմ պայքարի ԵԽ կոնվենցիան և մշակել ազգային մեխանիզմ, որը թրաֆիքինգի զոհերին արդյունավետ օգնություն ցուցաբերելու նպատակ ունի։
«Կենտրոնը համատեղ ծրագրերի մշակման, թրաֆիքինգի դեմ պայքարի վերապատրաստման անցկացման և խոցելի կետերի հայտնաբերման դաշտ կդառնա»,- ասաց Կապինոսը։
Նրա խոսքերով, կենտրոնը նաև մշտապես նորացվող տեղեկատվություն կտրամադրի թրաֆիքինգի դեմ պայքարին ուղղված միջոցառումների մասին, ինչպես նաև նման միջոցառումների վերլուծություն անցկացնել։
Իր հերթին, թրաֆիքինգի դեմ պայքարի հարցերով ԵԱՀԿ հատուկ ներկայացուցիչ Էվա Բյոդեն ընդգծեց, որ թրաֆիքինգի դեմ պայքարը առանցքային նշանակություն ունի մարդկանց անվտանգության ապահովման համար։
Նա գոհունակություն հայտնեց, որ նման նախագիծը լայն միջազգային ֆինանսական աջակցություն է ստանում։
«Հուսով եմ, որ Կենտրոնի գործունեությունը կուղեկցվի տարբեր երկրների փորձի կիրառմամբ։ Սակայն հեռանկարում չափազանց կարևոր է, որ Հայաստանն իրականացնի սեփական վերահսկողությունը տվյալ նախաձեռնության հանդեպ, իհարկե՝ համագործակցելով քաղաքացիական հասարակության ու միջազգային կառույցների հետ»,- հայտարարեց Բյոդեն։
Ռեսուրս-կենտրոնը կգործի ՀՀ աշխատանքի ու սոցիալական հարցերի նախարարության բազայի վրա։ Կենտրոնի ստեղծման ծրագիրը ֆինանսավորվում է Շվեդիայի, Ֆրանսիայի, Գերմանիայի և ԱՄՆ կառավարությունների կողմից։ Դրա գործունեությունը կիրականացվի 2008թ.-ի նոյեմբերին ԵԱՀԿ երևանյան գրասենյակի և ՀՀ աշխատանքի ու սոցիալական հարցերի նախարարության միջև ստորագրված Փոխհամաձայնության հուշագրի հիման վրա։ -0-
