Ավելի լավ է համաշխարհային ֆինանսատնտեսական ճգնաժամը, քան բարոյականն ու քաղաքականը. ՀՀ նախագահ

ԵՐԵՎԱՆ, 4 մայիսի. /Նովոստի-Արմենիա/. Ավելի լավ է համաշխարհային ֆինանսատնտեսական ճգնաժամը քան բարոյականն ու քաղաքականը, կարծում է ՀՀ նախագահ Սերժ Սարգսյանը։

«Ավելի լավ է ֆինանսատնտեսական ճգնաժամ ունենալ, քան բարոյան ու քաղաքական»,- նա ասաց Եվրոպայի երիտասարդ քաղաքական գործիչների՝ Ծաղկաձորում անցկացվող ոչ պաշտոնական հավաքի մասնակիցներին։  

Նախագահի խոսքերով՝ համաշխարհային ֆինանսատնտեսական ճգնաժամը հայկական երևույթ չէ, այլ համաշխարհային։ «Ճգնաժամը մարտահրավեր է ողջ աշխարհի հանրությանը, սակայն ես վստահ եմ, որ այն կհաղթահարի այս ճգնաժամը»,- ասաց Սարգսյանը։

Նախագահն ընդգծեց, որ ժամանակակից պետությունները մեկուսացված կղզյակներ չեն և կապված են միմյանց հետ հազարավոր թելերով։ Հայաստանի համար նման կարևոր թելերից է հայկական սփյուռքը։

Եվրոպայի երիտասարդ քաղաքական գործիչների ոչ պաշտոնական հավաքը կազմակերպվել է ՄԻԱԿ կուսակցության կողմից՝ ՀՀ նախագահ Սերժ Սարգսյանի հովանավորությամբ։

Հավաքին մասնակցել են շուրջ 30 երիտասարդ քաղաքական գործիչներ 12 եվրոպական երկրներից և շուրջ 20 մարդ Հայաստանից։ Հանդիպման նպատակը երիտասարդ քաղաքական գործիչներին միջազգային հարաբերությունների, քաղաքական, տնտեսական ու այլ հարցերի շուրջ ոչ պաշտոնական ձևաչափում քննարկումներ անցկացնելու հնարավորություն տալն է։  

Ոչ պաշտոնական հավաքի ժամանակ մասնակիցները հանդիպել են ՀՀ վարչապետ Տիգրան Սարգսյանի, ԱԺ խոսնակ Հովիկ Աբրահամյանի և այլ բարձրաստիճան անձանց հետ։

Երիտասարդների ոչ պաշտոնական հավաքը Ծաղկաձորում անցկացվել է մայիսի 1-3-ը։ Դրան մասնակցել են երիտասարդ քաղաքական գործիչներ Ռուսաստանից, Ֆրանսիայից, Ուկրաինայից, Բելառուսից, Վրաստանից, Բելգիայից, Հունաստանից, Բուլղարիայից, Դանիայից, Հունգարիայից և Ղազախստանից։ -0-