Փաշինյանը մեկնաբանել է` արդյոք Հայաստանը պատրաստ է Ադրբեջանի հետ կնքել «խաղաղության համաձայնագիր»
ԵՐԵՎԱՆ, 7 նոյեմբերի./Նովոստի–Արմենիա/. ՀՀ վարչապետ Նիկոլ Փաշինյանը Հանրային հեռուստաընկերությանը տված հարցազրույցում մեկնաբանել է Հայաստանի պատրաստակամությունն արձագանքել Ադրբեջանի և Թուրքիայի կողմից հնչող «խաղաղության համաձայնագրի» կնքման առաջարկին։
Ավելի վաղ Թուրքիայի նախագահ Ռեջեփ Թայիպ Էրդողանը հայտարարել է, որ երկրի համար չեն մնա խոչընդոտներ Հայաստնաի հետ հարաբերությունների կարգավորման համար, եթե նա լուծի իր խնդիրները Ադրբեջանի հետ։ Ադրբեջանի նախագահ Իլհամ Ալիևը հայտարարել է, որ չի բացառում Երևանի հետ խաղաղության համաձայնագրի կնքման հնարավորությունը, «եթե դրական ազդակներ լինեն Հայաստանից»։ Միաժամանակ Ալիևը Զանգեզուրն ու Երևանն անվանել է «Ադրբեջանի պատմական տարածքներ» և խոստացել է «վերադառնալ այնտեղ»։
«Խաղաղության առաջարկը Ադրբեջանի մենաշնորհը չէ։ Մենք ինքներս ենք խաղաղության առաջարկ արել։ Եվ դա արել ենք մի քանի անգամ։ Շատ տարօրինակ են այդ հայտարարությունները, որ Հայաստանը չի արձագանքել։ Հայաստանը արձագանքել է այդ հայտարարություններին, Հայաստանը ասել է, որ պատրաստ է, և մենք ընդգծել ենք, որ ԵԱՀԿ Մինսի խմբի համանախագահության շրջանակներում բանակցային ձևաչափի նպատակը հենց խաղաղության համաձայնագրի հասնելն է։ Եվ մենք ասել ենք, որ այո, պատրաստ ենք այդ քննարկումներին և պատկերացնում ենք, որ այդ քննարկումները պետք է տեղի ունենան ԵԱՀԿ Մինսկի խմբի համանախագահության ձևաչափում կատարվող աշխատանքի արդյունքներով, մասնավորապես` Լեռնային Ղարաբաղի հակամարտության կարգավորման ներառմամբ», – ասաց Փաշինյանը։
Նրա խոսքով, Հայաստանը այս դիրքորոշումը հստակ արտահայտել է և ասել է, որ պատրաստ է խաղաղ զարգացման դարաշրջան բացելու օրակարգին։
«Այդ դարաշրջանը բացելու մանդատ ենք ստացել մեր ժողովրդից արտահերթ խրոհրդարան ընտրությունների արդյունքում։ Եվ դա արձանագրել ենք կառավարության ծրագրում և արձագանքել ենք միջնորդներին և հրապարակային արձագանքել ենք, որ այո, մենք պատրաստ ենք խաղաղ բանակցություններին», – ասաց Փաշինյանը։–0–
