Իսկանդարյանը` Երևանի վրա Բաքվի ճնշման, ՀԱՊԿ–ի հնարավոր արձագանքի և ՄԱԿ–ի ԱԽ դիմելու նպատակահարմարության մասին. ԷՔՍԿԼՅՈւԶԻՎ

ԵՐԵՎԱՆ, 17 նոյեմբերի./Նովոստի–Արմենիա/. Կովկասի ինստիտուտի տնօրեն, քաղաքագետ Ալեքսանդր Իսկանդարյանը «Նովոստի–Արմենիա» գործակալության թղթակցի հետ զրույցում մեկնաբանել է հայ–ադրբեջանական սահմանի արևելյան հատվածում իրավիճակի սրացումը։

«Ադրբեջանը շարունակում է ճնշում գործադրել Հայաստանի վրա իր ունեցած բոլոր հնարավոր միջոցներով` իր նպատակներին հասնելու համար։ Դա տեղի է ունենում մոտավորապես մայիսից, և ներառում է ճնշման տարբեր ձևեր», – ասաց նա։

Իսկանդարյանի խոսքով, հայկական իշխանությունների կողմից տարածքային զիջումներ դե–ֆակտո հնարավոր են, «մինչև հիմա Ադրբեջանը «կուլ է տալիս» տարածքի հատվածներ», բայց դե–յուրե առաջիկայում դժվար թե իրականացվեն նմանատիպ համաձայնություններ։

Փորձագետը կարծում է, որ ստեղծված իրավիճակը դեռևս բավականին խոշոր սրացում է։ Պատասխանելով այն հարցին, թե հնարավո՞ր է ՀԱՊԿ–ը ձեռնարկի ակտիվ գործողությունները` Իսկանդարյանը նշեց, որ եթե նկատի ունենք ռազմական գործողություններ ադրբեջանական զորքերի դեմ, «ապա դժվար թե»։

«Եթե խոսքն այն մասին է, որ փորձելու են դադարեցնել այս ակցիան, ապա նմանատիպ գործողություններ արդեն տեղի են ունենում», – ասաց նա։

Խոսելով ՄԱԿ–ի Անվտանգության խորհուրդ Հայաստանի դիմելու նպատակահարմարության մասին` քաղաքագետը նշեց, որ արագ արձագանքման իմաստով դա դժվար թե կարող է օգնել, բայց բոլոր հարթակներում աշխատանքի տեսանկյունից դա կարելի է և պետք է անել։
«ՄԱԿ–ի Անվտանգության խորհուրդ դիմելը շատ քիչ կապ ունի հիմա այս ռազմական ակցիայի դադարեցման հետ», – ասաց նա։

Սահմանին տիրող իրավիճակի մասին

Նոյեմբերի 16-ին, ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։ ՀՀ ԶՈՒ ստորաբաժանումները դիմել են պատասխան գործողությունների՝ հակառակորդի առաջխաղացումը կանխելու նպատակով։Հակառակորդը կիրառել է հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Ռուսական կողմի միջնորդությամբ ձեռք բերված պայմանավորվածության համաձայն՝ ժամը 18։30-ից ՀՀ արևելյան սահմանագոտում կրակը դադարեցվել է, իրադրությունը հարաբերականորեն կայունացել է։ ՊՆ–ի հաղորդմամբ, Ադրբեջանի սանձազերծած ագրեսիայի հետևանքով հակառակորդի վերահսկողության տակ է անցել 2 մարտական հենակետ։ Հայկական կողմն ունի 1 զոհ, 12 զինծառայող գերեվարվել է, 24–ի զինծառայողի հետ կապը կորել է։ Հակառակորդն ունի մինչև 70 զոհված և վիրավոր զինծառայող, ինչպես նաև զինտեխնիկայի զգալի կորուստներ։–0–