Հայաստանում Ռուսաստանի 102-րդ ռազմաբազայի ներկայությունը ՀՀ ինքնիշխանության միակ իրական երաշխիքն է․ ՌԴ ԱԳՆ

ԵՐԵՎԱՆ, 29 մարտի․/Նովոստի–Արմենիա/․ Հայաստանում Ռուսաստանի 102-րդ ռազմաբազայի ներկայությունը ՀՀ ինքնիշխանության միակ իրական երաշխիքն է։


Այս մասին ՏԱՍՍ-ին հայտնել են ՌԴ ԱԳՆ-ից՝ մեկնաբանելով «ԵՄ-ի և Հայաստանի հարաբերությունների խորացում. ավելի շատ Եվրոպա Հայաստանում, ավելի շատ Հայաստան Եվրոպայում» զեկույցը, որը պատրաստվել է ՆԱՏՕ-ի նախկին գլխավոր քարտուղար Անդերս Ֆոգ Ռասմուսենի ղեկավարությամբ։

«Առաջարկներն անվտանգության ոլորտում ամբողջությամբ հակասում են ողջախոհությանը։ Ռուսական 102-րդ ռազմաբազայի և ռուս սահմանապահների ներկայությունը Հայաստանի ինքնիշխանության միակ իրական երաշխիքն է։ Այն, որ դրանց դուրս բերումը ինչ-որ կերպ կամրապնդի հանրապետության ռազմական ներուժը, վտանգավոր դեմագոգիա է։ Արդեն այսօր ստիպելով վերանայել անվտանգության գոյություն ունեցող համակարգը՝ Արևմուտքը դրա փոխարեն կոնկրետ ոչինչ չի առաջարկում»,- նշել են Ռուսաստանի արտաքին գործերի նախարարությունից։–0–