ԵՐԵՎԱՆ, 5 նոյեմբերի./Նովոստի–Արմենիա/. Թուրքիայի նախագահ Ռեջեփ Թայիպ Էրդողանի գործողությունների նպատակն է քաոս ստեղծել բոլոր հարևան երկրներում և դառնալ իշխանության կենտրոն, կարծում են հայ քաղաքագետները։
Հայկական միասնական տեղեկատվական կենտրոնում կազմակերպված քննարկման ընթացքում ռազմական փորձագետ Մհեր Հակոբյանը հայտարարեց, որ վերջին տարիներին Թուրքիան «մեծացրել է նեոօսմանիզմի իր ախորժակը» և փորձում է թուլացնել հարևան երկրներն` այդ տարածքներում կենտրոնական ուժ դառնալու համար։
«Թուրքիային հաջողվել է քաոս ստեղծել Սիրիայում, ավելի քիչ հաջողությամբ` Իրաքում, փորձեր են արվում քաոս ստեղծել Լիբիայում, Հունաստանում։ Ցավոք, նման բան է սպասվում նաև Վրաստանին։ Իսկ մեր ներկա իրավիճակում (Արցախում) մենք տեսնում ենք քաոսի ռազմական արտահայտություն», – հայտարարել է Հակոբյանը։
Թուրքագետ Վարուժան Գեղամյանն իր հերթին նշեց, որ Թուրքիայի բազմամյա գործողությունները, որոնք ուղղված են օտար հողերի զավթմանը, վկայում են այն մասին, որ կան որոշ կառույցներ, որոնք հստակ ֆիքսում են Թուրքիայի տարածքային շահերը։
«Միգուցե սա սիմվոլիկ հնչի, սակայն Թուրքիայի ներկա պաշտպանության նախարար Հուլուսի Աքարի դոկտորական դիսերտացիան ռազմական բուհում նվիրված էր Հարավային Կովկասին և կոնկրետ Հայաստանին։ Դա վկայում է այն մասին, որ Թուրքիայի բարձրագույն զինվորական օղակներում Հարավային Կովկասի տարածաշրջանը համարվում է կենսական կարևոր նշանակություն ունեցող շահերի տարածք», – նշել է նա։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում