Երևանում 30-ամյա տղամարդը թիկունքից հրել-գցել է դեղատան աշխատակցուհուն, հափշտակել դրամարկղի փողն ու փախել (ՎԻԴԵՈ)
ԵՐԵՎԱՆ, 4 սեպտեմբերի․ /Նովոստի-Արմենիա/․ Օգոստոսի 26-ին Դավիթաշեն թաղամասի դեղատներից մեկում կողոպուտ է կատարվել: Մի տղամարդ մտել է դեղատուն, թիկունքից հրել-գցել է աշխատակցուհուն, հափշտակել դրամարկղի փողն ու փախել: Այս մասին հայտնում է ՀՀ ոստիկանության մամուլի ծառայությունը։
Ոստիկանության Մաշտոցի բաժնի օպերատիվ խումբը կատարվածի վերաբերյալ հաղորդումը ստանալուն պես մեկնել է դեպքի վայր: Ուսումնասիրել են` որտեղից ինչ են հափշտակել, զրուցել տուժողի հետ:
Անհայտ անձի ինքնությունը պարզելու, նրան և գողոնը հայտնաբերելու ուղղությամբ ոստիկանները անհետաձգելի միջոցառումներ ձեռնարկեցին: Բացահայտման աշխատանքներին միացան ոստիկանության Երևան քաղաքի վարչության քրեական հետախույզները»,- ասվում է հաղորդագրության մեջ:
Դեպքի վայրում ձեռք բերված փաստերի և ստացված տեղեկությունների համադրությամբ պարզվել է, որ կողոպուտը հնարավոր է կատարած լինի Սիսիան քաղաքի 30-ամյա մի բնակիչ:
«Օգոստոսի 29-ին ոստիկանության Երևան քաղաքի վարչության քրեական հետախույզները Անդրանիկի փողոցում հայտնաբերեցին կասկածվողին և բերման ենթարկեցին ոստիկանության Մաշտոցի բաժին»,- ասվում է ոստիկանության հաղորդագրության մեջ:
Փաստի առթիվ հարուցվել է քրեական գործ:
Բերման ենթարկված տղամարդը խոստովանել է կատարածը և ձերբակալվել:
Նախաքննությունը շարունակվում է:-0-
