«Շենգավիթ» ԲԿ-ում 30–ամյա ծննդկան է մահացել. ի՞նչ է կատարվել

ԵՐԵՎԱՆ, 18 սեպտեմբերի./Նովոստի-Արմենիա/. Այսօր «Շենգավիթ» բժշկական կենտրոնում 30-ամյա ծննդկան է մահացել:

Ինչպես NEWS.am–ին պատմել են Սեդայի հարազատները, վերջինիս հղիությունն անցել է առանց որևէ խնդրի, նախօրեին առավոտյան հիվանդանոց է գնացել իր ոտքով, իսկ ժամեր անց արդեն հարազատները չեն կարողացել կապ հաստատել նրա հետ։ Մինչև այս պահը ծննդկանի ընտանիքը չգիտի՝ ինչից է մահացել նա։

«Բժիշկ Սիրունյանն է այդ ընթացքում զանգել Սեդայի ամուսնուն, հարցրել այսինչ հակաբիոտիկից կարող է խնդիր ունենալ, մինչդեռ այդ դեղը թերթիկում նշված է, որ հակացուցված է Սեդային, ալերգիա ունի դրանից։ Մեզ ինֆորմացիա տալու  փոխարեն թիկնապահներով են լցրել հիվանդանոցը։ Հարազատները փորձել են վերև բարձրանալ՝ հասկանալու համար, թե ինչ է կատարվում, դրանից հետո միայն Սիրունյանը կանչել է վերև ու ցույց տվել, որ Սեդան մահացել է»,– պատմել են հարազատները։

Ընտանիքի անդամները տարակուսած են, թե ինչու են հիվանդանոցում նման դեղամիջոց ներարկել։

Սեդայի առաջնեկն աղջիկ է, վիճակը լավ է։

«Շենգավիթ» ԲԿ–ն NEWS.am–ի հետ զրույցում հաստատել են ծննդկանի մահվան լուրը՝ նշելով, որ առաջիկայում հաղորդագրություն կտարածեն

Ինչպես հաղորդում է ArmLur.am-ը, ծննդկանի հարազատները տեղի ունեցածում մեղադրում են բժիշկներին: Նրանք այս պահին գտնվում են հիվանդանոցում և հարազատների խոսքով, փորձում են կանխել, որպեսզի ծննդկանի դին դուրս չբերեն հիվանդանոցից: Այս պահին այնտեղ լարված իրավիճակ է: -0-