Կնոջից ջուր էին խնդրել ու հափշտակել դրամապանակը՝ 130 հազ. դրամով. գողության դեպք Լոռիում (ՎԻԴԵՈ)
22:54
18 Մարտի 2020
ԵՐԵՎԱՆ, 18 մարտի./Նովոստի-Արմենիա/. Թումանյան քաղաքի մի բնակչուհու վագոն-տնակից կատարվել է 130 հազար դրամի գողություն, ընդ որում գողության ժամանակ գողը վերջինիս ուշադրությունը շեղելու համար ջուր է խնդրել: Այս մասին հայտնել է ՀՀ ոստիկանության մամուլի ծառայությունը:
Մասնավորապես, հաղորդվում է, որ մարտի 14-ին, ժամը 12-ի սահմաններում, Թումանյան քաղաքի մի բնակչուհի ոստիկանության Թումանյանի բաժնում հաղորդում էր տվել, որ Ալավերդի-Վանաձոր ճանապարհի իր վագոն-տնակից գողացել են դրամապանակը։
«Դեպքի վայր մեկնած ոստիկանները պարզել են, որ նույն օրը, ժամը 3-ին, վագոն-տնակի դուռը թակել է մի երիտասարդ՝ երեք ընկերների հետ։ Ջուր են խնդրել, և երբ հեռացել են, տուժողը նկատել է, որ պայուսակը բաց է, իսկ դրամապանակը, որի մեջ մոտ 130 հազար դրամ կար, գողացել են»,- նշվում է տարածված հաղորդագրության մեջ։
Նշվում է, որ գողությունը կատարած անձին և գողոնը հայտնաբերելու ուղղությամբ ձեռնարկված միջոցառումների արդյունքում իրավապահները նույն օրը ոչ միայն պարզեցին վագոն-տնակ այցելած երիտասարդների ինքնությունը, այլև` թե նրանցից ով է կատարել գողությունը։
«Կասկածյալը, որ Շնող գյուղի 24-ամյա բնակիչ է, ժամը 18-ի սահմաններում ոստիկանության Թումանյանի բաժին հրավիրվեց։ Նա տվել է խոստովանական բացատրություն»,- նշվում է գերատեսչության հաղորդագրության մեջ: