Բախվել են երկու Ford Transit մեքենաներ. կան տուժածներ

ԵՐԵՎԱՆ, 3 նոյեմբերի. /Նովոստի-Արմենիա/. Ավտովթար է տեղի ունեցել կիրակի լույս առավոտյան Սպիտակի ոլորաններում:

Ինչպես հայտնում է ԱԻՆ մամուլի ծառայությունը, ժամը 05:04-ին «911» ծառայություն տեղեկություն է հաղորդվել, որ Սպիտակի ոլորաններում բախվել են ավտոմեքենաներ, կան տուժածներ:

Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:

Պարզվել է, որ Մ-3 ավտոճանապարհի Սպիտակ-Երևան հատվածի մոտ 19-րդ կմ-ին բախվել են «Ford Transit» (վարորդ՝ Արայիկ Մ., ծնված 1995 թ.) և «Ford Transit» (վարորդ՝ Արիս Ե., ծնված 1984 թ.) մակնիշների ավտոմեքենաները։


Մինչ փրկարարների՝ կանչի վայր հասնելը «Ford Transit» (վարորդ՝ Արայիկ Մ.) մակնիշի ավտոմեքենայի ուղևորը՝ Գայանե Մ.-ն (ծնված 1970 թ.), «Ford Transit» մակնիշի ավտոմեքենայի վարորդը՝ Արիս Ե.-ն, և ուղևորը՝ Ներսես Ն.-ն (ծնված 1965 թ.), հոսպիտալացվել են Սպիտակի ԲԿ։
Հաղորդման մեջ նշվում է, որ փրկարարները «Ford Transit» մակնիշի ավտոմեքենայի վարորդին՝ Արայիկ Մ.-ին, տեղափոխել են Սպիտակի ԲԿ:

Բժիշկները Ներսես Ն.-ի առողջական վիճակը գնահատել են միջին ծանրության, իսկ Արիս Ե.-ի, Գայանե Մ.-ի և Արայիկ Մ.-ի առողջական վիճակը՝ բավարար: -0-