Երևանում «Օպելի» վարորդը վրաերթի է ենթարկել 5 և 8 տարեկան երեխաների, նրանց հայրն ու հորեղբայրը ծեծի են ենթարկել վարորդին

ԵՐԵՎԱՆ, 4 հունվարի./Նովոստի-Արմենիա/. Հունվարի 3-ին, ժամը 12.25-ին, «Օպել» մակնիշի ավտոմեքենայի 31-ամյա վարորդը Արտաշիսյան և Շիրակի փողոցների խաչմերուկում վրաերթի է ենթարկել 5 և 8 տարեկան երկու երեխայի։ Վթարի հետևանքով տուժածները մարմնական վնասվածքներով տեղափոխվել են հիվանդանոց, հաղորդում է ՀՀ ոստիկանությունը:

«Նույն օրը, ժամը 15.50-ին, հիվանդանոցից ոստիկանության Շենգավիթի բաժնում հաղորդում է ստացվել, որ շտապօգնության խումբը Արտաշիսյան և Շիրակի փողոցների խաչմերուկից «ճակատային շրջանի և դեմքի սալջարդ քերծվածք» ախտորոշմամբ բուժօգնության է տեղափոխել 31-ամյա տղամարդու, որը հայտարարել է, որ իրեն ծեծի են ենթարկել վրաերթի ենթարկված երեխաների ծնողները», - նշվում է հաղորդագրության մեջ:

Ոստիկանության Չարբախի բաժանմունքից մեկնած օպերատիվ խմբի ծառայողները պարզել են, որ «Օպելի» վարորդին ծեծի են ենթարկել 39 և 40-ամյա տղամարդիկ։

Բացատրական աշխատանքի շնորհիվ ժամը 17.00-ին նրանք ներկայացել են բաժանմունք և տվել խոստովանական բացատրություն, որ հարվածներ են հասցրել վարորդի մարմնին, ինչպես և կոտրել են «Օպելի» կողային հայելին ու ապակին:

Վնասի չափը պարզվում է: Կատարվում է քննություն։-0-