ԵՐԵՎԱՆ, 22 մայիսի./Նովոստի–Արմենիա/. Վոլժսկիում մայիսի 20–ի գիշերն ամբողջությամբ այրվել է Արամ Բաղդասարյանի ընտանիքին պատկանող տունը, իրերն ու ավտոմեքենան։
«Գլխավորն այն է, որ բոլորը ողջ են, ոչ ոք չի տուժել, իսկ մնացածը կկարգավորվի», – նշում է Արամ Բաղդասարյանը` փորձելով չկորցնել լավատեսությունը։
Բաղդասարյանները եկել են Վոլգոգրադ հինգ տարի առաջ։ Գնել են հողատարածք, աստիճանաբար տուն են կառուցել։ Ընտանիքը դարձավ բազմազավակ։ Հիմա ընտանիքում մեծանում է չորս աղջիկ և մեկ տղա, գրում է kp.ru–ն։
«Ծխի հոտն առաջինը զգացել է կինս, ծուխը գալիս էր կաթսայանոցից։ Նա արթնացրել է բոլորին։ Մենք հազիվ հասցրել ենք դուրս գալ տնից։ Փառք Աստծուն, ոչ ոք այրվածքներ չի ստացել։ Սակայն կրակն ամեն ինչ ոչնչացրել է։ Վոլժսկի քաղաքի իշխանություններն արագորեն արձագանքել են, տրամադրել մունիցիպալ բնակատեղի», – նշում է Արամը։
2–9 տարեկան հինգ երեխաներն ու նրանց ծնողները դեռ բնակություն չեն հաստատել մունիցիպալ բնակարաններում։ Մեծահասակները վերականգնում են փաստաթղթերը, իսկ երեխաները դեռ ընկերների տանն են։
Սոցցանցերում արագորեն տարածվեց տեղեկատվությունն այն մասին, որ ընտանիքը չունի անգամ հագուստ, և մարդիկ սկսեցին արձագանքել։
«Ինձ անընդհատ զանգում են, առաջարկում օգնություն, իրեր։ Սակայն ես արդեն ստիպված եմ հրաժարվել, չնայած շատ շնորհակալ եմ, որ մարդիկ անտարբեր չեն։ Պարզապես իրերը պահելու տեղ չկա։ Առաջիկայում մենք յոթ հոգով բնակվելու ենք 27 քառակուսի մետր տարածքում։ Դժվար թե այնտեղ ավել ինչ–որ բան տեղավորվի», – նշում է Արամը։
«Եթե դուք պատրաստ ենք օգնել ընտանիքին, ապա կարող եք զանգահարել ընտանիքի հորը 89616980000 հեռախոսահամարով», – նշվում է հաղորդագրության մեջ։–0–