Ողբերգական ավտովթար Երևանում` 4 մեքենաների մասնակցությամբ. կան զոհեր ու վիրավորներ (ՎԻԴԵՈ)

ԵՐԵՎԱՆ, 9 մարտի./Նովոստի–Արմենիա/. Նախօրեին խոշոր ու ողբերգական ավտովթար է տեղի ունեցել Երևանում։

Ինչպես հաղորդում է ՀՀ ԱԻՆ Փրկարար ծառայությունը, մարտի 8-ին, ժամը 00:51-ին Ճգնաժամային կառավարման ազգային կենտրոն տեղեկություն է ստացվել, որ Երևանի Սեբաստիա փողոցում՝ «999» բենզալցակայանի մոտակայքում, տեղի է ունեցել ՃՏՊ՝ հրդեհի բռնկմամբ, կան տուժածներ:

Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երեք մարտական հաշվարկ:

Պարզվել է, որ բախվել են «Hyundai Accord» (վարորդ՝ Արսեն Ս., ծնված 1987 թ.), «Toyota Camry» (վարորդ՝ Հայկ Կ., ծնված 1995 թ.), «Nissan Murano» (վարորդ՝ Հովհաննես Յ., ծնված 1982 թ.) և «Mercedes-Benz S» (վարորդ՝ Սեդրակ Ս., ծնված 1986 թ.) մակնիշների ավտոմեքենաները: «Toyota Camry» մակնիշի ավտոմեքենայի շարժիչի հատվածում տեղի է ունեցել էլեկտրական լարերի կարճ միացում՝ առանց հրդեհի բռնկման:

««Hyundai Accord» մակնիշի ավտոմեքենայի վարորդ Արսեն Ս.-ն տեղում մահացել է, իսկ ուղևոր Արթուր Հ.-ն (ծնված 1986 թ.) և վարորդներ Սեդրակ Ս-ն և Հայկ Կ-ն տարբեր աստիճանի մարմանական վնասվածքներով հոսպիտալացվել են «Աստղիկ» ԲԿ, որտեղ բժիշկները Հայկ Կ.-ի առողջական վիճակը գնահատել են ծանր, Սեդրակ Ս.-ն ստանալով առաջին բուժօգնություն՝ դուրս է գրվել, իսկ Արթուր Հ.-ն հիվանդանոցում մահացել է»,– նշվում է հաղորդագրության մեջ:

Փրկարարները հոսանքազրկել են «Hyundai Accord» և «Toyota Camry» մակնիշի ավտոմեքենաները և կատարել «Toyota Camry» մակնիշի ավտոմեքենայի հովացման աշխատանքներ:

Ինչպես հաղորդում է shamshyan.com–ը, փաստի առթիվ հարուցվել է քրեական գործ՝ ՀՀ ՔՕ 242 հոդվածի 3-րդ մասի հատկանիշներով (Ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ)։–0–