ԵՐԵՎԱՆ, 16 հունվարի./Նովոստի–Արմենիա/. Նախօրեին` հունվարի 15-ին, սպանություն է տեղի ունեցել Արմավիրի մարզում։
Shamshyan.com–ի հաղորդմամբ, ժամը 19։00-ից 19։10 ընկած ժամանակահատվածում ոստիկանության Վաղարշապատի բաժին օպերատիվ տեղեկություններ են ստացվել, որ Գայի գյուղում՝ ժողովրդին հայտնի «Մեյմանդարի» շուկայում, վիճաբանություն է տեղի ունեցել և ըստ օպերտիվ տեղեկությունների՝ կան տուժածներ։
Ոստիկաններն ու քննիչները նշված շուկայում՝ կանաչեղենի վաճառքի բաժնում՝ տաղավարներից մեկի մոտ, հայտնաբերել են տղամարդու դի՝ պարանոցի մասում սուր կտրող-ծակող առարկայի հետքով։
Ոստիկաններն ու քննիչները նշված վայրում հայտնաբերել են նաև խոհանոցային դանակ, որի վրա առկա են արնանման հետքեր։
Մինչ դեպքի վայրում աշխատում էր դատական բժիշկը, ոստիկաններն ու քննիչները պարզել են, որ մահացածը Լոռու մարզի բնակիչ 50-ամյա Սարգիս Ա․-ն է։
Ոստիկանությունում նաև օպերատիվ տեղեկություններ են ստացվել, որ ևս մեկ հոգի վնասվածքներով տեղափոխվել է «Վաղարշապատ» բժշկական կենտրոն, ով Լոռու մարզի բնակիչ 29-ամյա Արթուր Հ․-ն է։
Դեպքի փաստով ստեղծվել է քննչական խումբ, նախաձեռնվել է քրեական վարույթ։
Shamshyan.com-ի տեղեկություներով՝ մինչ դատաբժիշկը սպանության վայրում աշխատում էր, Վաղարշապատի ոստիկանությունում օպերատիվ տեղեկություններ են ստացվել, որ սպանություն կատարած անձը դեպքի վայրից դիմել է փախուստի ու գտնվում է Երևանում։
Ոստիկանության օպերատիվ խմբերը ուղևորվել են Երևան ու Գրիգոր Լուսավորիչ փողոցում հայտնաբերել կասկածյալին ։
Կայքի տեղեկություններով, սպանությունը կատարելու կասկածանքով հայտնաբերված ու քննչական բաժին ներկայացվածը Արմավիրի մարզի բնակիչ 56-ամյա Անդրանիկ Կ․-ն է։
Ըստ նախնական տեղեկությունների՝ սպանությունը տեղի է ունեցել գյուղմթերքի շուկայում կենցաղային հարցերի շուրջ ծագած վիճաբանության ժամանակ։
Կայքի տեղեկություններով՝ Անդրանիկ Կ․-ն քննիչի որոշմամբ ձերբակալվել է։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում