Վանաձորում 49–ամյա գյումրեցին կնոջ գրպանից «թռցրել էր» բջջային հեռախոսը

ԵՐԵՎԱՆ, 5 մայիսի./Նովոստի–Արմենիա/. Մայիսի 3-ին ոստիկանության Տարոնի բաժնում հաղորդում տված կինը հայտնել էր, որ Վանաձորի Տիգրան Մեծի փողոցի դեղատանը գողացել են բջջային հեռախոսը՝ պատճառելով 150 000 դրամի վնաս, հաղորդում է ՀՀ ոստիկանությունը:


Տարոնի բաժնի քրեական հետախույզները ձեռնարկած օպերատիվ-հետախուզական միջոցառումների արդյունքում պարզել են, որ նշված դեղատանը, օգտվելով քաղաքացու անուշադրությունից, հեռախոսը նրա բաճկոնի գրպանից գողացել էր գյումրեցի 49-ամյա տղամարդը:

Նա հրավիրվել է ոստիկանության Տարոնի բաժին և բացատրական աշխատանքի արդյունքում խոստովանել արարքը՝ ներկայացնելով գողացած հեռախոսը:

Կատարվում է նախաքննություն:–0–