Սևանում 59–ամյա քաղաքացի է ջրահեղձ եղել, դին փնտրել են 3 օր

ԵՐԵՎԱՆ, 20 փետրվարի./Նովոստի–Արմենիա/. Ողբերգական դեպք է տեղի ունեցել Սևանում։

ՀՀ ԱԻՆ Փրկարար ծառայության հաղորդմամբ, փետրվարի 18-ին, ժամը 14:20-ին Գեղարքունիքի մարզային ճգնաժամային կառավարման կենտրոն ահազանգ է ստացվել, որ Շորժա գյուղի հյուրատան մոտ՝ ափամերձ տարածքում, քաղաքացի է ջրահեղձվել, դին դուրս բերելու համար անհրաժեշտ է ջրափրկարարների օգնությունը:

Դեպքի վայր է մեկնել ԱԻՆ ՓԾ մարզային փրկարարական վարչության հատուկ ջրափրկարարական ջոկատներից երկու մարտական հաշվարկ:

Ժամը 20:09-ին մթության պատճառով որոնողական աշխատանքները դադարեցվել են անարդյունք:

«Փետրվարի 20-ին, ժամը 09:40-ին Շորժա գյուղի հյուրատան մոտկայքում՝ ափամերձ տարածքում, կորած քաղաքացու որոնողական աշխատանքները վերսկսելու նպատակով դեպքի վայր է մեկնել ԱԻՆ ՓԾ մարզային փրկարարական վարչության հատուկ ջրափրկարարական ջոկատից երկու մարտական հաշվարկ։ Ջրափրկարարները ջրից դուրս են բերել Խ․ Մ․-ի (ծնված 1962 թ.) դին», – նշվում է գերատեսչության հաղորդագրության մեջ:–0–