Սարսափելի ավտովթար Շիրակում. բեռնատարը բռնկվել է. ԿԱԴՐԵՐ ԴԵՊՔԻ ՎԱՅՐԻՑ
11:09
07 Հուլիսի 2022
ԵՐԵՎԱՆ, 7 հուլիսի./Նովոստի–Արմենիա/. Նախօրեին խոշոր ավտովթար է տեղի ունեցել Շիրակի մարզում, հաղորդում է ՀՀ ԱԻՆ Փրկարար ծառայությունը։
Հուլիսի 6-ին, ժամը 22։58-ին Շիրակի մարզային ճգնաժամային կառավարման կենտրոն ահազանգ է ստացվել, որ Հացիկ-Մայիսյան ավտոճանապարհին տեղի է ունեցել ՃՏՊ:
Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։
«Պարզվել է, որ Հացիկ-Մայիսյան ավտոճանապարհին «GAZ-53» մակնիշի բեռնատարը դուրս է եկել ճանապարհի երթևեկելի հատվածից և բռնկվել։ Տուժածներ Մ․ Մ․-ն (ծնված 2006 թ․) և Կ․ Մ․-ն (ծնված 2007 թ․) տարբեր աստիճանի այրվածքներով հոսպիտալացվել են «Գյումրու մոր և մանկան ավստրիական հիվանդանոց», իսկ Ա․ Մ․-ն (ծնված 1994 թ․)՝ Գյումրի քաղաքի ԲԿ», – նշվում է գերատեսչության հաղորդագրության մեջ։
Հրդեհը մեկուսացվել է ժամը 23։05-ին, մարվել՝ 23։43-ին։ Այրվել են «GAZ-53» մակնիշի բեռնատարի դիմային հատվածը և խցիկը:–0–