Ներքին Բազմաբերդ գյուղում պայթյուն է տեղի ունեցել, 3 տուժածներից մեկի վիճակը ծանր է

ԵՐԵՎԱՆ, 11 մարտի./Նովոստի-Արմենիա/. Մարտի 11-ին, ժամը 09:54-ին Արագածոտնի մարզային ճգնաժամային կառավարման կենտրոն ահազանգ է ստացվել, որ Ներքին Բազմաբերդ գյուղում տեղի է ունեցել պայթյուն, կան տուժածներ, հաղորդում է Փրկարար ծառայությունը։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։


Պարզվել է, որ գյուղի 1-ին փողոցի տներից մեկի 1-ին հարկում գտնվող հացատանը գազաբալոններից (3 կգ, 10 կգ և 20 կգ) տեղի է ունեցել գազի արտահոսք, կուտակում և պայթյուն՝ առանց հրդեհի բռնկման․ փլուզվել է պատը (մոտ 2 քմ) և վնասվել մեկ դուռ։

Բնակիչներ Ա․ Ե․-ն (ծնված 2010 թ․), Կ․ Գ․-ն (ծնված 1980 թ․) և Վ․ Ե․ (ծնված 1969 թ․) ստացել են տարբեր աստիճանի այրվածքներ․ դեպքի վայրում բժիշկները Կ․ Գ․-ի առողջական վիճակը գնահատել են ծանր, Ա․ Ե․-ինը՝ միջին ծանրության, իսկ Վ․ Ե․-ինը՝ բավարար։

Փրկարարները տուժածներին մոտեցրել են շտապօգնության ավտոմեքենաներին, ովքեր հոսպիտալացվել են Երևանի «Այրվածքաբանության ազգային կենտրոն» ՓԲԸ։-0-