Գեղարքունիքում նորածին երեխա են գտել. շները տոպրակը քաշելով հասցրել են գյուղացիներից մեկի տան ետնամաս

ԵՐԵՎԱՆ, 22 հուլիսի./Նովոստի-Արմենիա/. Գեղարքունիքի մարզում այսօր արտակարգ դեպք է տեղի ունեցել:

Ներքին Գետաշեն գյուղի մատուռի մոտ տապրակով թողնված նորածին երեխային գյուղի շները քաշելով հասցրել են գյուղացիներից մեկի տան ետնամաս, որտեղ էլ տանտիրուհին գտել է նրան։

Այս մասին news.am-ի հետ զրույցում ասel 1 Ներքի Գետաշեն գյուղի վարչական ղեկավար Ռուբեն Զուլոյանը։

«Դեպքը տեղի է ունեցել մոտավորապես 10։30-ին: Բնակչուհին շների ձայն է լսել, դուրս է եկել տնից, իր տան բակի ետնամասում հավաքված շատ թափառական շներ է տեսել, նրանց քշել է այդ հատվածից, հետո ձայն է լսել, ու դեղին տոպրակ է տեսել։ Մոտեցել է ու տեսել է տոպրակում նորածին երեխա։ Նորածնին գրկել, տուն է տարել, հետո ոստիկանություն ենք զանգել», - ասել է նա։

Զուլոյանի խոսքով՝ երեխային մատուռից 50-60 մետր հեռավորության վրա են գտել:

Վարչական շրջանի ղեկավարը ենթադրում է, որ երեխային թողել են մատուռի մոտ, այնտեղից էլ շները քաշելով տան մոտ են հասցրել։

Բարեբախտաբար, շները նորածին տղային չեն վնասել, քաշելուց տոպրակն է պատառոտվել:

«Երեխային հիվանդանոց ենք տեղափոխել, այնտեղ կշռել են, 1 կգ 900 գրամ էր կշռում։ Բժիշկներն ասացին` մի 5-6 ժամ առաջ է լույս աշխարհ եկել: Ոստիկանները հարցաքննություններ են իրականացրել ամբողջ թաղամասում, չեմ կարծում, որ մեր գյուղից է, երևի ուրիշ տեղից են բերել, թողել, գնացել»,– ասել է նա։-0-