ԵՐԵՎԱՆ, 19 դեկտեմբերի./Նովոստի-Արմենիա/. Երեկ՝ դեկտեմբերի 18-ին, սպանություն է տեղի ունեցել Գեղարքունիքի մարզում։
Shamshyan.com-ի հաղորդմամբ, ժամը 20։15-ի սահմաններում «Գավառ» բժշկական կենտրոնից ոստիկանության Գավառի բաժին ահազանգ է ստացվել, որ բժշկական կենտրոնի շտապօգնության խումբն իրենց մոտ է տեղափոխել տղամարդու դի։
Ոստիկաններն ու քնիչները պարզել են, որ մահացածը Երևանի բնակիչ 31-ամյա Էդվարդ Հ․-ն է։
Դատաբժշկի նախնական եզրակացության համաձայն՝ նա եղել է դանակահարված, մարմնի տարբեր մասերին կտրած-ծակած վնասվածքներով։
Ոստիկանները պարզել են, որ մահացածին շտապօգնության ավտոմեքենան հիվանդանոց է տեղափոխել Գավառ քաղաքի Սայադյան փողոցի 15 հասցեից։
Տեղում պարզվել է, որ նշված տունը պատկանում է Գավառի բնակիչ 42-ամյա Սարգիս Մ․-ին։ Տունը, որը երկհարկանի է, 1-ին և 2-րդ հարկերի տարբեր սենյակներում ոստիկաններն ու քննիչները հայտնաբերել են բազմաթիվ արնանման հետքեր։
Դեպքի փաստով ստեղծվել է քննչական խումբ, սպանություն հատկանշներով նախաձեռնվել է քրեական վարույթ։
Կայքի տեղեկություններով՝ ոստիկանները ժամերի ընթացքում պարզել են, որ նույն օրը, ժամը 20։00-ի սահմաններում նշված հասցեում Գավառի բնակիչ 48-ամյա տղամարդը (նախաքննության շահերից ելնելով, այս պահին որոշ մանրամասներ չեն հրապարակվում) կենցաղային հարցերի շուրջ վիճաբանել է Էդվարդ Հ․-ի հետ, որի ժամանակ դանակով հարվածներ է հասցրել վերջինիս, ինչի հետևանքով նա մահացել է։
Կասկածյալը տաք հետքերով հայտնաբերվել և տեղափոխվել է ոստիկանության Գավառի բաժին, այնուհետև ձերբակալվել է։
Կայքի տեղեկություններով՝ սպանվածն ու սպանության կակածանքով ձերբակալվածը նախկինում մի քանի անգամ եղել են դատապարտված։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
