Ծեծկռտուք ԱԺ-ում. ի՞նչ է իրականում տեղի ունեցել

ԵՐԵՎԱՆ, 7 դեկտեմբերի․/Նովոստի-Արմենիա/․ Իշխող «Քաղաքացիական պայմանագիր» խմբակցության պատգամավորներն այսօր խորհրդարանի միջանցքում կռվել են ընդդիմադիր պատգամավորների օգնականների հետ:

«Հայաստան» ընդդիմադիր խմբակցության պատգամավոր Իշխան Սաղաթելյանի օգնականը լրագրողների հետ զրույցում ասաց, որ երբ գրասենյակ էր մտնում, հանկարծ աղմուկ է լսել, և մոտենալով՝ տեսել է, որ ծեծկռտուք է։ Նա ասաց, որ դեպքի վայրում տեսել է «Քաղաքացիական պայմանագրի» կուսակցության պատգամավորներ Հրաչյա Հակոբյանին, Վահագն Ալեքսանյանին, Սիսակ Գաբրիելյանին:

«Ես մենակ էի, մեր տղաներին ծեծում էին, ոչ ոք ոչինչ չէր ձեռնարկում, ոչինչ չէր անում։ Պատգամավորներն առանձին կանչել են օգնականներին և ծեծել», - նշեց նա։

Նա ասաց նաև, որ ամեն ինչ տեղի է ունեցել ԱԺ փոխնախագահ Ռուբեն Ռուբինյանի աշխատասենյակում ։ Նրա խոսքով ՝ ընդդիմադիր պատգամավորները դեպքի վայրում չեն եղել: Եղել են միայն իշխանական պատգամավորները և ընդդիմադիր պատգամավորներ Իշխան Սաղաթելյանի, Թադևոս Ավետիսյանի և Արմենուհի Կյուրեղյանի օգնականները:

«Անվտանգության աշխատակիցները ոչինչ չէին անում, միայն մեր տղաներին մի կողմ քաշեցին, իսկ նրանց չէին հանգստացնում»,- ասաց նա։-0-