40–ամյա տղամարդը 82–ամյա տատիկին սպառնացել ու գումար է պահանջել, բայց, չստանալով, հափշտակել է կարի մեքենան

ԵՐԵՎԱՆ, 14 մարտի./Նովոստի–Արմենիա/. Մարտի 8-ին ոստիկանության Վաղարշապատի բաժնում ստացված տեղեկություններն ավազակության մասին էին։ Ժամը 23-ի սահմաններում Ակնաշեն գյուղում բնակվող 40-ամյա մի տղամարդ մտել էր համագյուղացի 82-ամյա մի կնոջ տուն, հաղորդում է ՀՀ ոստիկանությունը։

Թոշակառու տանտիրուհին միայնակ էր ապրում և այդ պահին քնած էր։ Տղամարդը դանակով սպառնալով՝ պահանջել էր ոսկյա զարդեր ու փող, որոնք չստանալով՝ հափշտակել էր կարի մեքենան ու փախել։


«Հետագա միջոցառումներով կարի մեքենան հայտնաբերվել է. տղամարդն այն ճանապարհին գցել էր ու շարունակել փախուստը։ Վաղարշապատի բաժնի քրեական հետախույզները օպերատիվ-հետախուզական միջոցառումների շնորհիվ ժամերի ընթացքում բացահայտեցին հանցագործությունը: 40-ամյա ակնաշենցին հայտնաբերվել ու ձերբակալվել է», – նշվում է գերատեսչության հաղորդագրության մեջ:

Նախաձեռնվել է քրեական վարույթ։ Տղամարդը և դեպքի առթիվ կազմված փաստաթղթերը ներկայացվել են նախաքննական մարմին: Նա կալանավորվել ու տեղափոխվել է քրեակատարողական հիմնարկ։–0–